Спорт гимнастикаси бўйича Олимпиада ўйинларининг ғолиб ва совриндори, икки карра жаҳон чемпиони, ўзбекистонлик Оксана Чусовитина жорий йилнинг 23 октябрь — 1 ноябрь кунлари Шотландиянинг Глазго шаҳрида ўтказиладиган жаҳон чемпионатида ҳам муносиб иштирок этиб, 2016 йилги Олимпиада ўйинларига йўлланма олишни мақсад қилган. Бу ҳақда Ўзбекистон Миллий Олимпия қўмитаси матбуот хизмати хабар беради.
Агарда Оксана буни уддаласа у ҳолда ушбу Олимпиада ўйинлари унинг фаолиятидаги еттинчиси бўлади. Таъкидлаш жоизки, спорт гимнастикасида бундай муваффақиятга ҳали ҳеч бир спортчи эриша олмаган. У 1992—2012 йиллар давомида ўтказилган ёзги Олимпиада ўйинларининг барчасида қатнашган дунёдаги ягона спортчи ҳисобланади.
«Ҳозирда менинг ягона мақсадим Олимпия ўйинлари йўлланмасини қўлга киритишдир. Олимпиада ўйинларида еттинчи бор қатнашиш менинг энг катта орзуимдир», — дейди Чусовитина. Унинг сўзларига қараганда, Глазгода у тўрт снаряднинг барчасида иштирок этиш ниятида.
Изоҳ (0)