Тошкентдаги Республика олимпия захиралари теннис мактаби кортларида якунига етиб бораётган «Челленжер» туркумига кирувчи, мукофот жамғармаси 125 минг доллардан иборат бўлган турнирнинг жуфтликлар баҳсида ярим финал учрашувлари ўтказилди, деб хабар беради «Оламспорт».
Мусобақада биринчи рақам остида таснифланган Денис Истомин жуфтлик баҳсида ярим финал чиптасини қўлга киритгани ҳақида хабар берган эдик. Афсуски, беларуслик Александр Бурий билан жуфтлик ҳосил қилган Истомин финал остонасида германиялик Андре Бегеманн ҳамда асли россиялик, айни пайтда Янги Зеландия шарафини ҳимоя қилаётган Артём Ситак тандемига 4:6, 2:6 ҳисобида имкониятни бой бериб қўйди.
Таъкидлаш жоиз, Истомин 15 октябрнинг ўзида учта учрашувда кортга чиқди. Ёмғир сабаб ўйинлар бир кун кейинга кечиктирилганди. Денис Истомин кеча, 15 октябрь куни яккаликда иккинчи давра ҳамда чорак финал учрашувларида иштирок этди ва ҳар иккаласида рақибларини уч сет натижасига кўра мағлубиятга учратди.
Изоҳ (0)