“Йўқ дейишдан олдин таклифини кўрайлик” — Азиз Абдуҳакимов Чорвоқдаги Sea Breeze лойиҳаси ҳужжатлари ҳали топширилмаганини айтди

Тошкент вилояти Бўстонлиқ туманидаги Чорвоқ сув омбори бўйида Sea Breeze Uzbekistan сайёҳлик мажмаси қурилиши кутилмоқда. Бироқ лойиҳа ҳужжатлари ҳали ҳукуматга тақдим этилмаган. Бу ҳақда 23 июль куни Тошкент шаҳрида ўтказилган матбуот анжуманида экология вазири Азиз Абдуҳакимов маълум қилди, дея хабар берди “Дарё” мухбири.

Азиз Абдуҳакимовнинг айтишича, лойиҳа тўғрисида норасмий равишда — оғзаки айтилган. Аммо зарур ҳужжатлар ҳозирча тақдим этилмаган.

“Шунинг учун ҳужжатни олиб келишларини илтимос қилдик. Ҳужжат бўлгандан кейин ўзимиз ҳам, Қурилиш вазирлиги, Сув хўжалиги вазирлиги ва бошқа тегишли вазирлик ҳамда идоралар эътирозлари ёки таклифларини билдира олади. Ҳали ҳужжат йўқ, лекин бизлар “йўқ бўлмасин” демоқдамиз. Олдин ҳужжат келсин. Бир нарсага “йўқ” дейишдан аввал, у нарса пайдо бўлиши керак. Ҳали бизда таклиф ҳам, ҳужжат ҳам йўқ”, деди вазир.

Азиз Абдуҳакимов лойиҳа ҳужжатлари тақдим этилгач, мажмуа қурилиши масаласи жамоатчилик муҳокамасига қўйилишига ваъда берди.

“Менимча, уни бекитиб, кечаси шундай қўл қўйиб, чиқариб юборадиган одам йўқ республикада”, деди вазирлик расмийси.

Вазир сўзларига кўра, девелопер ўз-ўзидан келиб, Чорвоқда қурилиш қилмоқчи бўлмаган, балки тадбиркор тажрибали экани сабаб Ўзбекистон томони уни мамлакатга таклиф қилган.

“Унинг минглаб таклифлари бор. Ҳозир мана ким эшитган бўлса, Қирғизистон ҳам чақиряпти, Қозоғистон ҳам. Туркияда жуда катта лойиҳаларни амалга оширяпти. Яна Черногорияга бориб лойиҳа қиламан, деяпти. Шунинг учун мен айтмоқчи бўлганим, бизлар йўқ дейишдан олдин таклифини бир кўрайлик. Олдин таклифини берсин, кўрайлик ўзи нима таклиф қилаётганини. Ҳали кўрмасдан йўқ дейишимиз, менимча, ақлга тўғри келмайдиган нарса”, деган Азиз Абдуҳакимов.

Маълумот учун, жорий йил 14 апрелда президент Шавкат Мирзиёевга Sea Breeze Uzbekistan халқаро туризм маркази мастер-режаси тақдим қилинган. Умумий қиймати 10 млрд долларлик лойиҳа Чорвоқ сув омбори бўйида, озарбайжонлик тадбиркор Эмин Агаларов томонидан амалга оширилиши маълум. Мажмуа кўприк, хиёбон, пляж, меҳмонхоналар, коттежлар, уйлар, ресторан ва томошагоҳларни қамраб олиши анонс қилинган. Давлат раҳбари мажмуани зарур инфратузилма билан таъминлаш бўйича кўрсатмалар берган.

Лойиҳа Чорвоқнинг 577 гектар ер майдонини эгаллаши кўзда тутилган. Дастлабки босқичда 100 гектар ҳудуд қамраб олинади. 

Чорвоқ сув омбори Тошкент шаҳри ва атрофдаги ҳудудлар учун асосий чучук сув манбаи ҳисобланади. Шу сабаб унинг соҳилида қуриладиган мажмуа лойиҳаси ижтимоий тармоқларда фаоллар норозилигига сабаб бўлди. Хусусан, қурилиш ишлари сабабли ичимлик суви ифлосланиб, унинг сатҳи кескин тушиб кетишидан хавотир билдирилди. Қолаверса, ҳудуддаги дарахтлар кесилиб, яшилликка путур етиши, одамлар сув соҳилига киришига чекловлар киритилиши мумкинлиги ҳам этирозлар уйғотган.