MVP — минимал ишчи маҳсулот нима?

MVP (инглизча minimum viable product — минимал яшовчан маҳсулот) — тўлиқ миқёсда ишлаб чиқилгунига қадар талабни синаб кўриш учун мўлжалланган маҳсулотнинг энг оддий ишлайдиган прототипи. Бундай ёндашув тадбиркорни якуний маҳсулотнинг талабгир эмаслиги ва ишлаб чиқаришга сарфланган манбаларни йўқотишдан сақлаб қолади.

Мақоладаги расмда (чизиқ остида) тўла-тўкис автомобилни яратиш учун минимал ишчи маҳсулотлар ролини, навбатма-навбат, скейт, самокат, велосипед ва мотоцикл бажармоқда. Ушбу маҳсулотларнинг ҳар бири А нуқтадан Б нуқтагача етиб олиш муаммосини ҳал қилади. Уларнинг ҳар бири мустақил равишда ишлайди (расмнинг биринчи қисмида эса ғилдираклар ўзларича юра олмайди, улар катта маҳсулотнинг бир қисми холос). MVP’га мижозлар қизиқиш билдириши амалда ўз исботини топса, маҳсулотнинг функцияларини аста-секинлик билан мураккаблаштириб, уни мижозлар учун қулайроқ ҳолга келтирамиз.

MVP истеъмолчининг муайян муаммосини ҳал қилувчи бор-йўғи битта функцияни бажаради. MVP маҳсулот устида ишлашни маълум бир аудитория талабларига мувофиқ равишда охиригача етказиш ёки ундан бутунлай воз кечиш учун минимал уринишлар билан ахборот тўплаш имконини беради.

Бироқ диққатли бўлинг: сифатсиз синов маҳсулотини чиқарманг. Истеъмолчилар ўта хом синов маҳсулотини рад этади, тадбиркор эса янглишиб, ғоянинг ўзини яроқсизга чиқаради.

Одамлар сотиб олишни истайдиган маҳсулотни максимал даражада кам пул сарфлаган ҳолда ишлаб чиқиш керак.

Ишлаб чиқишни бошлашдан аввал сизнинг MVP’ингиз нима эканлигини аниқлаштириб олишингиз керак: маҳсулотингиз қандай функцияларга эга бўлиши керак, қандай функциялар эса мажбурий эмас?

MVP’ни ишлаб чиқиш ҳақида келаси мақолаларда батафсил маълумот берамиз.

Лойиҳа «Дарё» ва StartupFactory.uz томонидан ишга туширилган.