Reuters’нинг собиқ муҳаррири Anonymous хакерлари билан тил бириктиришда айбланди

Reuters агентлигининг собиқ муҳаррири Los Angeles Times газетаси сайтини бузиш мақсадида Anonymous хакерлар гуруҳи билан тил бириктирганликда айбдор деб топилди. 7 октябрь, чоршанба куни Калифорния штатидаги (АҚШ) Сакраменто шаҳар федерал суди шундай ҳукм чиқарди, дея хабар бермоқда «ТАСС».

Тергов маълумотларига кўра, Los Angeles Times ҳам таркибига кирадиган The Tribune Company медиакорпорациясида 2010 йилда фаолият юритган ва кейинчалик лавозимидан озод этилган 28 ёшли Мэттью Кис Anonymous хакерларига компаниянинг хизмат аккаунтлари паролини берган. Прокуратура даъвосига кўра, Кис ўзининг ишдан бўшатилгани учун шундай ўч олган.

Паролни қўлга олган хакерлар газета интернет-сайтини бузиб кириб, унда чоп этилган материалларга ўзгартиришлар киритган. The Tribune Company вакилларининг маълум қилишича, хакерлик ҳужуми оқибатларини бартараф этиш учун 300 иш соати кетган ва бу корпорацияга 18 минг долларга тушган.

Кис кейинчалик Reuters агентлигига муҳаррир бўлиб ишга жойлашган, аммо кибержиноятчилар билан тил бириктиргани ошкор бўлгач, 2013 йили у ердан ҳам бўшатилган. Журналистга нисбатан якуний ҳукм келгуси йил январь ойида эълон қилинади. Унга 10 йилгача бўлган қамоқ жазоси берилиши мумкин.