Google бошқарув тизимидаги ўзгаришлар натижасида тузилган Alphabet компанияси лотин алифбосининг барча ҳарфларини ўзида жамлаган abcdefghijklmnopqrstuvwxyz.com доменини сотиб олди. Бу ҳақда The Wall Street Journal маълумотларига таяниб, «Nur.kz» хабар бермоқда.
Мазкур домен номи 1999 йилда рўйхатга олинган, бироқ бирор сайтга берилмаган эди. Унинг маълумотлар базаси 7 октябрда янгиланиб, эгаси сифатида @google.com электрон манзили кўрсатилди.
Alphabet харид амалга ошганини тасдиқлади. Компания вакили аввал олинган abc.xyz доменида лотин алифбосининг бир неча ҳарфи етмаганлиги, шу сабаб раҳбарият бу хатони ўнглашга қарор қилганини ҳазиломуз таъкидлаб ўтди.
Alphabet alphabet.com доменини ололмади, бу ном BMW компаниялар гуруҳи томонидан фойдаланилади. Компанияга abc.com домени ҳам насиб этмади, мазкур электрон манзил ABC медиакомпаниясига тегишли.
Изоҳ (0)