Эронда 4 октябрь куни Ҳаж амалларини бажариш вақтида Саудия Арабистонининг Мино водийсида 24 сентябрь куни юз берган тиқилинч оқибатида ҳалок бўлган зиёратчиларнинг дафн маросимлари бўлиб ўтади. Бу ҳақда «ТАСС» хабар бермоқда.
4 октябрь, якшанба куни бутун Эрон бўйлаб миллионлаб кишилар, ҳалок бўлганларнинг тобутларини кўтарганича, мотам юришларига чиқди.
Теҳрон кўчаларига бир неча юз минг киши чиққан, мамлакатнинг аҳоли сони бўйича иккинчи шаҳри — Машҳад ҳамда Гулистон вилояти маъмурий маркази Горган шаҳарлари кўчаларига ҳам тахминан шунча одам чиққан.
Маросимлар митингларга айланиб кетяпти. Мотам тадбирларидан репортажлар Эрон ахборот телеканаллари орқали жонли эфирда трансляция қилинмоқда.
Куни кеча Саудия Арабистонидан Теҳронга 104 нафар эронлик зиёратчининг жасади олиб келинган эди, 4 октябрь куни тонгда эса яна 114 кишининг жасади олиб келинди.
Эрон давлат ҳаж ва зиёратчилик ишлари ташкилотидан маълум қилишларича, Мино водийсидаги фожиали ҳодиса натижасида 465 нафар эронлик ҳалок бўлган. Сўнгги маълумотларга кўра, Минодаги фожеа натижасида 760 дан ортиқ одам ҳалок бўлган.
Изоҳ (0)