Ўзбекистон Футбол Федерацияси президенти Мираброр Усмоновнинг сўзларига кўра, келишилган ўйинларни ташкил қилишдаги асосий гумонланувчилар — бу клубларнинг катта раҳбарларидир. ЎФФ раҳбари бу ҳақда 2 октябрь куни бўлиб ўтган мажлисда айтиб ўтди, дея хабар бермоқда ЎФФ матбуот хизмати.
Мираброр Усмоновнинг қайд этишича, «клубда расман ишламайдиган катта-катта раҳбарлар борки, футболнинг бугунги об-ҳавосига таъсир кўрсатишга уринади. Улар клублар, мураббийлар қолиб, майдондаги футболчиларни йўлдан уришга ҳаракат қилади ва бундай раҳбарлар аллақачон кузатув остига олинган».
«Мен сизга ваъда бераманки, бундай раҳбарлар январь ойигача футболдан кетади. Мени гапимни яхшилаб етказинглар, ўзлари яхшиликча кетмаса, шармандалик билан кетадилар», — деди ЎФФ президенти Мираброр Усмонов.
Эслатиб ўтамиз, футбол бўйича Ўзбекистон Олий Лигаси доирасида 25 сентябрь куни ўтказилган «Пахтакор» — «Металлург» (3:2) учрашувининг сўнгги дақиқалари ЎФФ томонидан спорт принсиплари ва этикасига зид деб топилиб, «Металлург» бош мураббийи Рустам Мирсодиқовнинг лицензияси 2015 йил охирига қадар бекор қилингани футбол жамоатчилиги ўртасида шов-шувларга сабаб бўлганди.
ЎФФ президенти «Пахтакор» — «Металлург» учрашувида рўй берган воқеаларни «катта шармандалик» деб атаб, 2015 йилги мавсум якунларига кўра «Пахтакор» футбол клуби қаттиқ жазоланишини, келишилган ўйинларда қатнашгани исботланган жамоаларни эса унвонларидан маҳрум қилиш масаласи кўриб чиқилишини маълум қилди.
Изоҳ (0)