25 сентябрь куни iPhone 6s ва iPhone 6s Plus Австралия, Буюк Британия, Хитой, Франция, Япония, АҚШ каби ўнта мамлакат ҳудудида сотувга чиқди, дея хабар бермоқда TJournal.
Анъанага кўра, iPhone’нинг янги авлоди чиқиши билан, уни турли усуллар билан синаб кўра бошлашди. Нашр улардан баъзиларини келтириб ўтди.
TechSmartt портали тести iPhone 6s ва iPhone 6s Plus аввалги авлод қурилмаларига нисбатан қулашдан анча яхшироқ ҳимояланганини кўрсатди.Ҳар иккала смартфон ҳам шим чўнтаги ва қулоқ сатҳидан ташлаб юборилганида омон қолди, корпуслари аҳамиятсиз даражада тирналди, холос. Бироқ юқорига чўзилган қўлдан тушган 6s’нинг дисплейи дарз кетди, 6s Plus эса эксперимент стул устига чиқиб такрорланганида ҳам зарарсиз қолди.
PhoneBuff ўтказган шунга ўхшаш текширув эса iPhone 6s ва 6s Plus’ни юқори бўлмаган баландликдан ҳам экрани билан пастга ташласа, бемалол синдириш мумкинлигини кўрсатди. Орқаси билан тушганида эса қурилма деярли зиён-заҳматсиз қолади.
FoneFox’дагилар эса смартфонларни эгишга уриниб кўрди, бироқ улар iPhone 6 ва iPhone 6 Plus’дан анча мустаҳкам эканлигини аниқлади. 6s Plus’ни иккинчи одам ёрдамидагина букишга муваффақ бўлишди.
JerryRigEverything YouTube канали текшируви 6s’нинг корпус ва дисплейини калит ва бошқа металл буюмлар билан осонгина тирнаш мумкинлигини исботлади. Муаллиф, шунингдек, смартфонни қўллари билан эга олди. iPhone 6s очиқ оловга теккизилганида ҳам омон қолди.
Изоҳ (0)