Нима учун стартапларга бизнес-режа керак эмас?

Таниқли америкалик тадбиркорлар, кўплаб муваффақиятли стартаплар инвестор ва консультантлари Стив Бланк ва Боб Дорф ўз нутқларида бизнес-режа стартапнинг биринчи рақамли душмани эканлигини айтиб келади.

Ўн йил аввал Кремний водийсида ҳамма гўёки стартап катта компаниянинг кичик версиясидек, бизнес-режа тузарди. The Startup Owner's Manual: The Step-By-Step Guide for Building a Great Company китоби муаллифи бўлмиш Стив Бланк барчасини ўзгартирди. Энди ҳеч қайси акселератор ёки инвестиция жамғармаси стартаплардан бизнес-режа сўрамайди.

Гап шундаки, бизнес-режа реаллик билан биринчи тўқнашувга ҳам бардош бера олмайди. 100 саҳифали бизнес-режа бизнеснинг классик турлари, ишлаб чиқариш корхоналари учун зарур. Бизнес-режа ёзаётган пайтингизда инновацион стартап учун вазият 180 градусга ўзгариб кетади ва бутун бизнес-режангиз эскиради.

Яхши инвесторларга сиз бизнес-режа деб атайдиган ва графиклар билан тўлдирилган расмий қонун-қоидалар китоби керак эмас. Яхши инвесторни ўзингизга ишонтира олсангиз, унинг ўзи бизнес-режани беш дақиқадаёқ миясида тузиб чиқади.

Албатта, режалаштириш керак, стартаплар тартибсиз ёки стратегиясиз ҳолда ишламайди. Режалаштириш бўйича ишларнинг барчаси Business Model Canvas, стартап бизнес-модели негизи доирасида олиб борилади. Бу лойиҳанинг бир саҳифали резюмеси бўлиб, у стартап учун муҳим қирраларнинг барчасини қамраб олади. Стартапчилар эса бизнес-моделни ҳар куни синовдан ўтказади.

Келгуси мақолаларда бу мавзу бўйича янада батафсил маълумот берамиз.

Лойиҳа «Дарё» ва StartupFactory.uz томонидан ишга туширилган.