АҚШ Аэрокосмик агентлиги (NASA) шов-шувли равишда таниқли бўлган руҳоний Жон Хэги шу йил кузатиладиган кетма-кет ой тутилишлари билан боғлаётган охират ва метеорит қулаши «аслида мумкин эмаслиги» ва ҳақиқатга алоқадор эмаслиги ҳақида расмий баёнот билан чиқди, деб ёзади Tengri News.
Аввалроқ сан-францисколик руҳоний Инжилдаги матнлардан иқтибос келтириб, 2015 йил сентябрида метеорит қулаши ва қиёмат қойим бўлишини башорат қилган эди. Бу ҳақда у NASA’ни ҳам огоҳлантирган.
Агентлик расман маълум қилишича, Ернинг энг хавфли астероидлар билан тўқнашиш эҳтимоли 0,01 фоиздан ошмайди, шу йилнинг сентябрида эса сайёрага Ерга яқин хавфли осмон жисмларидан ҳеч бири яқин келмайди.
Эслатиб ўтамиз, сентябрь ойида бирйўла икки — қисман Қуёш ва тўлиқ Ой тутилишини кузатиш мумкин бўлади. 13 сентябрда Қуёш 78 фоизга беркилади, уни кузатиш учун энг қулай ҳудудлар Антарктида, Жанубий Африка ва Мадагаскардир. 28 сентябрда рўй бериши кутилаётган Ой тутилишини эса Россиянинг Европадаги қисми, Ғарбий Европа ва Африка, иккала Американинг шарқий қирғоқларида кўриш мумкин.
Изоҳ (0)