АҚШ ўзининг Россияга қарши қаратилган санкция рўйхатларини кенгайтиргани муносабати билан Россия Ташқи ишлар вазирлиги мазкур ҳолатга изоҳ берди. Бу ҳақда «Eurointegration.com.ua» хабар бермоқда.
Вазирлик баёнотида қайд этилишича, АҚШнинг мазкур қарори «Америка—Россия муносабатларини барқарорлаштиришга қаратилган имкониятларни онгли равишда, босқичма-босқич йўқ қилиш бўйича АҚШ ҳукмрон доираларида илдиз отган ҳаракатлар кўзгусидир».
«Кўп жиҳатдан уммон ортидан туриб келтириб чиқарилган ва аланга олдирилган Украинадаги кенг миқёсли инқироз АҚШ маъмурияти томонидан Россия учун номақбул «хулқ модели»ни татбиқ этиш учун асос сифатида фойдаланилмоқда», — дейилади Россия ТИВ баёнотида.
«Россияга қарши қаратилган санкция рўйхатларини кенгайтириш — сўнгги вақтларда АҚШ томонидан Россияга нисбатан турли, жумладан, ҳарбий, иқтисодий ва виза соҳаларида амалга оширилган бутун-бир душманона ҳаракатлар кетма-кетлигининг навбатдаги элементидир», — деб ёзади вазирлик.
«Алоҳида қайд этамиз: АҚШ мазкур ҳаракатларни ўзи учун салбий оқибатларсиз давом эттира олиши борасида хом хаёлларга бормаслиги керак. Биз томондан жавоб чоралари кўрилади», — дейилади Россия ТИВ баёнотида.
Аввалроқ АҚШ савдо вазирлиги Эрон, Шимолий Корея ва Сурияга ядровий ва ракета технологияларини етказиб беришга жалб этилган Россия компанияларига нисбатан санкциялар жорий этганди.
Изоҳ (0)