Ўзбекистон Мустақиллигининг 24 йиллиги муносабати билан қатор соҳалар ходимлари мукофотланди

Ўзбекистон Республикаси Президенти Ислом Каримов 26 август куни Ўзбекистон Республикаси Мустақиллигининг йигирма тўрт йиллиги муносабати билан давлат хизматчилари ҳамда ишлаб чиқариш ва ижтимоий-иқтисодий соҳалар ходимларидан бир гуруҳини мукофотлаш тўғрисидаги фармонни имзолади. Фармоннинг тўлиқ матни ЎзАда эълон қилинган.

Фармонда айтилишича, «мамлакатимиз иқтисодий салоҳиятини юксалтириш ва ислоҳотларни муваффақиятли амалга ошириш ишларидаги катта хизматлари, кўп йиллик самарали меҳнати билан қишлоқ ва сув хўжалиги, саноат, транспорт, алоқа ва қурилиш соҳаларини ривожлантиришга қўшган салмоқли ҳиссаси ҳамда ижтимоий ҳаётдаги фаол иштироки учун» бир қатор шахсларга фахрий унвонлар берилади.

Жумладан, «Ўзбекистон Республикасида хизмат кўрсатган пахтакор», «Ўзбекистон Республикасида хизмат кўрсатган ирригатор», «Ўзбекистон Республикасида хизмат кўрсатган чорвадор», «Ўзбекистон Республикасида хизмат кўрсатган пиллачи», «Ўзбекистон Республикасида хизмат кўрсатган саноат ходими», «Ўзбекистон Республикасида хизмат кўрсатган транспорт ходими» унвонлари икки нафардан кишига, «Ўзбекистон Республикасида хизмат кўрсатган алоқа ходими», «Ўзбекистон Республикасида хизмат кўрсатган фуқаро авиацияси ходими» унвонлари бир нафардан фуқарога, «Ўзбекистон Республикасида хизмат кўрсатган қурувчи» унвони эса уч нафардан соҳа ходимларига берилди.

Шунингдек, фармонда «Ватанимиз мустақиллигини мустаҳкамлаш, унинг иқтисодий қудратини юксалтириш, ёш авлодни она юртга муҳаббат, истиқлол ғояларига садоқат руҳида тарбиялаш ишларига қўшган муносиб ҳиссаси, фидокорона меҳнати, ватанпарварлиги ва ижтимоий ҳаётдаги фаоллиги билан эл-юрт иззат-ҳурматига сазовор бўлганлиги учун» 14 нафар фуқаро «Эл-юрт ҳурмати» ордени билан, 14 киши «Фидокорона хизматлари учун» ордени билан, 18 нафар фуқаро «Меҳнат шуҳрати» ордени билан, 27 киши «Дўстлик» ордени билан, 100 ёшдан ошган 14 нафар фуқаро «Шуҳрат» медали билан, 14 киши «Жасорат» медали билан, 3 киши «Содиқ хизматлари учун» медали билан, яна 126 нафар фуқаро «Шуҳрат» медали билан мукофотланиши белгилаб қўйилди.