Буюк Британиянинг Ўзбекистондаги элчиси Жорж Эдгар 24 август куни Chevening стипендия дастури доирасида Британия университетларида таълим олиш ҳуқуқини қўлга киритган ўзбекистонлик мутахассисларга тегишли сертификатларни топширди. Бу ҳақда «Review.uz» хабар бермоқда.
Chevening дастури Буюк Британия ҳукуматининг халқаро стипендияси бўлиб, мамлакат Ташқи ишлар вазирлиги ва ҳамкор ташкилотлар томонидан молиялаштирилади. Дастур доирасида бутун дунёдан келган етакчилик қобилиятига эга талабалар Британия университетлари магистратурасида таълим олиш ҳуқуқини қўлга киритади. 1994 йилдан бери мазкур дастур доирасида ўзбекистонлик 200 га яқин мутахассис Британияда ўқиди.
2015 йилда, бир неча босқичли мураккаб саралаш босқичидан сўнг, давлат, хусусий ва нодавлат соҳаларда меҳнат қилаётган саккиз мутахассис Chevening стипендиясининг Ўзбекистондаги соҳибларига айланди. Ғолиблар Лондон, Ноттингем, Бирмингем, Кардифф, Эссекс ва Редингнинг нуфузли университетларида магистратура йўналиши бўйича билим олади.
Ўзбекистонлик талабалар юриспруденция, иқтисодиёт, инглиз тилидан таълим бериш, ахборот технологиялари, жамоатчилик билан алоқалар ва глобал коммуникацияларни бошқариш, иқлим ўзгариши ва иқтисодий ривожланиш, давлат бошқаруви каби фанлар бўйича малака оширади.
Изоҳ (0)