«Дарё»нинг Windows телефонлари учун мобил дастури чиқарилди

«Дарё»нинг Android платформасидаги смартфонлар ҳамда iPhone учун мўлжалланган мобил дастурлари бир йилдан ошиқроқ вақт давомида ишлаб келаётганидан хабарингиз бор. Энди эса улар қаторига Windows Phone операцион тизимида ишловчи смартфонлар учун дастур ҳам қўшилди.

Тўғри, Android ва iOS учун чиқарилган дастурлардан фарқли равишда ушбу ишланма расмий эмас. Бироқ эътиборли томони шундаки, уни «Дарё» муштарийларидан бири — 9-синф ўқувчиси Азиз Ёқубжонов ишлаб чиққан.

Windows Phone 8’дан юқори версияларда ишловчи дастурда «Дарё» янгиликларини ўқиш, алоҳида рукнлардаги хабарларни кўриш мумкин. Шунингдек, калит сўзлар орқали керакли янгиликни қидириш имконияти ҳам мавжуд.

Windows Phone платформасида ишловчи смартфонлар эгалари дастурни Windows Phone Store’дан қуйидаги ҳавола орқали юклаб олишлари мумкин: goo.gl/GAhNJT.

Муаллиф ҳақида

Азиз Ёқубжонов Тошкент шаҳри Учтепа туманидаги 107-мактабнинг 9-синфида ўқийди. «Ушбу дастурни яратишда нашрнинг кўплаб ўқувчиларига ёрдам бериш, шунингдек, дастурлаш ва дизайн бўйича қобилиятларимни  яхшилаш имконияти илҳом бўлиб хизмат қилди», — деди Азиз.