Британиядаги назорат қилувчи Information Comissioner’s Office (ICO) идораси Google’га аввалроқ Европа Иттифоқида қабул қилинган «унутилиш ҳуқуқи» тўғрисидаги суд қарори доирасида қидирувдан олиб ташланган маълумотларга ҳавола берувчи мақолаларни ўчириб ташлаш мажбуриятини юклади. Бу ҳақда The Guardian газетаси хабар бермоқда.
Қидирув гиганти мазкур мақолаларга ҳаволаларни узоғи билан 20 сентябрга қадар ўчириб ташлаши керак. Бу вақтга қадар «унутилиш ҳуқуқи»га қаршилар мазкур мақолаларни қайтадан чоп этишлари мумкин.
Аввалроқ Google, индивидуал сўров асосида, бундан 10 йил аввалги жиноят ҳақидаги ахборотни ўзида жамлаган маълумотларни қидирув натижаларидан ўчириб ташлаган эди. Бу ҳолат «унутилиш ҳуқуқи»га қаршиларнинг кескин норозилигига сабаб бўлди ва улар бу мавзуга бағишлаб бир неча хабар чоп этди.
Орадан маълум вақт ўтиб, янги матнлар Google томонидан индексация қилинди ва қидирув натижаларида пайдо бўлди. Мазкур хабарларнинг кириш қисмини ҳисобга олмаса, қолган қисми қидирув натижаларидан чиқариб ташланган ахборот билан деярли бир хилдир.
Европа Иттифоқи олий суди 2014 йил 13 июнь куни Google ва бошқа қидирув тизимларига эскирган ва долзарб бўлмаган маълумотларга йўлловчи ҳаволаларни қидирув натижаларидан чиқариб ташлаш мажбуриятини юклаган эди. Мазкур норма жорий этилганидан кейинги бир йил давомида европаликлар томонидан маълумотларни ўчиришни сўраб, миллиондан ортиқ сўров йўлланди.
ICO — Буюк Британиядаги мустақил назорат қилувчи орган бўлиб, у жамият манфаатлари йўлида ахборот ҳуқуқларини қўллаб-қувватлаш, давлат органлари фаолиятининг очиқлиги ва жисмоний шахсларнинг маълумотлари махфийлигига кўмак бериш мақсадида ташкил этилган.
Изоҳ (0)