Навбатдаги ICTWEEK Uzbekistan 2015 ахборот-коммуникация технологиялари ҳафталиги 14—18 сентябрь кунлари бўлиб ўтади, дея хабар бермоқда тадбир матбуот хизмати. «Газета.uz»нинг ёзишича, бу йилги ҳафталик бир қатор ихтисослаштирилган тадбирларни ўзида бирлаштирган бўлиб, уларнинг баъзилари илк бор ўтказилади.
ICTEXPO 2015 кўргазмаси мисли кўрилмаган кўламда бўлиб ўтади — унда 2000 квадрат метр майдонда 150 компания ўз маҳсулот ва хизматларини намойиш этади. Кўргазма Тошкентда (15—17 сентябрда) ва Самарқандда (15—16 сентябрда) бўлиб ўтади. Унга 30 мингдан ортиқ меҳмон ташриф буюриши кутилмоқда.
Илк бор ташкил этилаётган ICTFORUM 2015 форуми эса (16—17 сентябрда ўтказилади) АКТ ривожланиши тенденсияларини муҳокама қилиш учун ўзига хос эксперт майдончасига айланиши тахмин қилинмоқда. У блокли конференциялар (eGovernment Uzbekistan, BestSoft Uzbekistan, Startup Conference, «АКТ ва туризм»), шуъбали мажлислар («Телекоммуникациялар ва инфратузилма», «Интернет ва ахборот ресурслари», «Ахборот хавфсизлиги»), маҳорат машғулолари ва муҳокамалар кўринишида ўтказилади.
АКТ бўйича анъанавий ICTSUMMIT 2015 (18 сентябрда ўтказилади) саммити эса соҳанинг йиллик ривожи сарҳисобини ўтказади ва келажакка доир стратегик вазифаларни муҳокама қилади. Саммитда давлат органлари, IT-корхоналар ва ташкилотлар, халқаро экспертлар ва жаҳон компаниялари вакиллари иштирок этади.
ICTEXPO 2015 доирасида 15—17 сентябрь кунлари гаджетлар ярмаркаси — Gadget Fair бўлиб ўтади. Ярмарка меҳмонлари янги қурилмаларни сотиб олишлари мумкин бўлади.
АКТ ҳафталиги доирасида LG CNS Uzbekistan қўшма корхонасининг очилиш маросими, BestSoft Challenge дастурчилар танлови, очиқ маълумотлар бўйича хакатон (Data.gov.uz Hackathon), Intellec2All IT-лойиҳалар республика конкурси, MIT.UZ ёшлар интернет-танлови, шунингдек, UCG FIFA киберфутболи бўйича Ўзбекистон Кубоги каби қатор қизиқарли воқеалар бўлиб ўтади.
ICTWEEK Uzbekistan 2015’нинг расмий сайти — www.ictweek.uz’да тадбирда қатнашиш учун рўйхатдан ўтиш ва ҳафталик воқеалари ҳақида батафсил ахборот олиш мумкин.
ICTWEEK ҳафталиги Ўзбекистон Ахборот технологиялари ва коммуникацияларини ривожлантириш вазирлиги кўмагида ўтказилади. Ўзбекистон Ахборот технологиялари корхоналари ва ташкилотлари ассоциацияси ҳамда ICTNEWS нашри ҳафталик ташкилотчиларидир.
Изоҳ (0)