Шу кунларда Telegram мессенжерининг ўзбекистонлик фойдаланувчилари орасида Чорвоқда айиқ бир одамни ғажиб, иккига бўлиб ташлагани ҳақида хабар ва бунга доир фотосуратлар тарқалиб бормоқда.
Суратларда тумшуғи қонга беланган айиқ ҳамда танаси иккига бўлинган одам жасади тасвирланган бўлиб, фойдаланувчилар бир-бирларига суратдаги одам Чорвоқ йўлида айиқнинг қурбонига айлангани, шу сабабли йўлда тирбандлик юзага келганини маълум қилган.
Қизиқарлиси, Россия Узоқ Шарқи ҳақида хабарлар берувчи «Восток-Медиа» ахборот агентлиги худди шу суратлар ҳақида ахборот тайёрлаб, Россиянинг Приморье ўлкасида WhatsApp мессенжери орқали айнан шундай хабарлар тарқалаётганини маълум қилган. Воқеа жойи сифатида кўплаб вариантлар тарқалиб кетган: кимдир Дальнегорск, кимдир Владивосток яқинида, Садгород туманида, яна биров Русский оролида айиқ ҳужум қилгани ҳақида маълум қилган.
Бундан ташқари, ушбу вирус хабар нафақат Приморье ўлкасида, балки Узоқ Шарқнинг бошқа минтақаларига — Хабаровск ўлкаси, Амур вилояти ва Сахалинга ҳам тарқалган бўлиб, ҳар бир ҳудудда «воқеа»нинг ўз ривожи тўқилган. Хабар остига изоҳ қолдирганлар ушбу суратлар Якутия, Татаристон ва Ўзбекистонгача етиб келганини ҳам таъкидлаган.
Бу даҳшатли фотосуратлар Ўзбекистонда туширилмаганлиги бўйича очиқ-ойдин фактни яна бир бора тасдиқлайди. Қолаверса, Россиянинг ўзида ҳам тасвирлар қачон ва қаерда олингани маълум эмас. Энг кўп тарқалган версияларга кўра улар 2011 йилда Қорачой-Черкасияда ёки 2014 йилда Камчаткада олинган.
Изоҳ (0)