БМТ Қаддафий тузуми тарафдорларини суд қилишда қоидабузарликларга йўл қўйилганини аниқлади
Ливияда Муаммар Қаддафий тузуми вакиллари устидан олиб борилган суд жараёни давомида халқаро адолатли суд тамойилларига риоя этилмаган, шунингдек, кўплаб қоидабузарликларга йўл қўйилган. Бу ҳақда БМТнинг инсон ҳуқуқлари бўйича олий комиссари бошқармаси вакили Равина Шамдасани маълум қилди, дея хабар бермоқда «Ведомости».
28 июль куни Триполи суди полковник Муаммар Қаддафийнинг ўғли Сайф ал Исломни 2011 йилда амалга оширилган ҳарбий жиноятларда айбдор деб топди ва ўлим жазосига маҳкум этди. У билан бирга Ливия жамаҳирияси собиқ етакчиси яқинларидан яна саккиз киши, хусусан, разведка хизматининг собиқ директори Абдулла ал-Сануссий ва парламентнинг собиқ депутати Бағдодий ал-Маҳмудий ҳам ўлимга ҳукм қилинган.
«Биз ҳибсда сақланиш ва суд жараёнларини диққат билан кузатиб бордик ва халқаро адолатли суд тамойилларига риоя этилмаганини аниқладик. Асосий камчилик сифатида суд аниқ жиноятлар учун айбланувчиларнинг индивидуал жавобгарлигини белгилай олмаганини кўрсатиш мумкин. Шунингдек, гумонланувчиларнинг адвокатлар хизматидан фойдаланиши борасида муаммолар бўлган, уларга ёмон муносабатда бўлингани ҳақида ариза тушган ва баъзи суд мажлислари гумонланувчиларнинг иштирокисиз ўтказилган», — дея қўшимча қилди Шамдасани.
БМТ ИҲОКБ ҳар қандай ҳолатда ҳам ўлим жазосини қўллашга қарши чиқади, деди ташкилот вакили. Унинг сўзларига кўра, БМТ ИҲОКБ Ливия ҳукуматини адлия ишларида инсон ҳуқуқларини поймол этмасликка чақиради ва Триполи суди ҳукми устидан шикоят берилиши мумкинлигига умид қилади.
BBC News хабарига кўра, ҳозирги вақтда Ливияда Қаддафий тузумининг ўнлаб тарафдорлари 2011 йилги оммавий намойишларни бостиришга алоқадорликда гумон қилиниб, судланмоқда. Судланувчилар ҳукм устидан апелляция беришга ҳақли.
