Украина бош вазири ўринбосари Валерий Вошчевский Украина инфратузилма вазирлиги, ташқи ишлар вазирлиги ва давлат авиахизматига зудлик билан Украина ва Ўзбекистон ўртасидаги ҳаво қатновини қайта йўлга қўйиш бўйича чоралар кўришни топширди, дея хабар бермоқда UzDaily 13 июль куни бўлиб ўтган Украина ҳукуматининг тезкор мажлиси натижаларига таяниб.
Украина инфратузилма вазири биринчи ўринбосари сўзларига кўра, шу ҳафтадаёқ Ўзбекистоннинг Украинадаги элчиси Алишер Абдуалиев билан учрашув ўтказилиб, икки давлат ўртасидаги авиақатновни қайта тиклаш бўйича масалалар муҳокама қилинади.
Нашр эслатишича, аввалроқ рейслар «Украина халқаро ҳаво йўллари» ва «Ўзбекистон ҳаво йўллари» авиакомпаниялари томонидан ҳафтада бир марта амалга оширилар эди. Бироқ Украина давлат авиахизмати «Ўзбекистон ҳаво йўллари»нинг Украинага парвозларни амалга ошириш учун рухсатномасини бекор қилгач, Ўзбекистон ҳам «МАУ»га нисбатан шундай йўл тутган эди.
Изоҳ (0)