Бюджетдан ташқари Пенсия жамғармаси туман бўлимида пенсия ва нафақаларни тайинлаш гуруҳи инспектори лавозимида ишлаган 27 ёшли шахсни нафс эгри йўлга бошлади, деб ёзади «Ҳуқуқ» газетаси.
Бу йўлда у ўзига «ҳамфикр» ҳам топди. У «Ҳужжатларни илмий техникавий қайта ишлаш нодавлат архиви» МЧЖ бошлиғи лавозимида ишлайдиган 40 ёшдан ошган аёл эди.
2014 йилнинг ноябрь ойида инспекторнинг ҳузурига бир аёл кириб, 54 ёшда эканлиги, пенсияга чиқмоқчилигини айтади. Инспектор қонунга биноан аёллар 55 ёшда пенсияга чиқиш ҳуқуқига эга эканлигини, агар иш стажи 20 йил бўлса, имтиёзли равишда 54 ёшдан пенсияга чиқиши мумкинлигини тушунтиради. Аммо аёл иш стажи у даражада эмаслигини айтиб, агар иложи бўлса ёрдам беришни илтимос қилади. Инспектор шу заҳоти ёрдам беришга тайёр эканлигини билдириб, уни ноқонуний йўлга бошлайди. Яъни архивга бориб, бир танишига учрашишни тайинлайди-да, бу ўз-ўзидан бўлмаслигини тушунтириб, ёрдами учун ундан 700 минг сўм сўрайди. Аёл рози бўлиб, унинг ёнидан чиқади.
Тез кунда архив маълумотномаси тайёр бўлади. Унда аёл 1993—2007 йилларда «Намангангўштсавдо» ОАЖда фаррош бўлиб ишлаганлиги қайд этилиб, иш ҳақлари кўрсатилганди. Жамиятнинг «Ишчи-хизматчиларнинг ойлик маошини ҳисоблаш китоби»га сохта маълумот, ёзув ва ўзгартиришлар киритилади. Ана шу йўл билан бу аёл пенсионер сифатида 3 ойлик пенсия пулини олади.
Албатта, қинғир ишнинг қийиғи чиқиши учун кўп вақт керак бўлмади. Олиб борилган текшириш ва суриштирувлар натижасида инспектор ва архив бошлиғининг қилмишлари ўз исботини топди. Улар суд ҳукмига кўра тегишли жазо олди.
Изоҳ (0)