Кўплаб фотосуратларда тамаки чекаётгани ҳолда намоён бўладиган КХДР етакчиси Ким Чен Ин ўз мамлакати учун сигерат импортини чеклади. Kommersant.ru’нинг хабар беришича, мазкур чеклов ҳақидаги буйруқ ўтган йили имзоланган ва, статистик маълумотларга кўра, КХДР Тайвандан сигарет сотиб олишни тўхтатган.
КХДРдаги савдо айланмасини кузатиб борувчи Корея савдога кўмак бериш ташкилоти (КОТРА)нинг Тайбейдаги ваколатхонаси 2015 йил январь-март ойлари давомида Шимолий Кореяга бирор марта сигарет етказиб берилганини қайд этмади. Бир йил аввал худди шу вақт оралиғида 2006 йилдан бери КХДРнинг асосий тамаки етказиб берувчиси ҳисобланган Тайвандан Кореянинг шимолига 80 минг долларлик маҳсулот юборилганди.
КХДРда тамаки чекишга қарши ташвиқот ишлари олиб борилмоқда, хусусан, тамаки маҳсулотлари нархи оширилмоқда. Айни вақтда, мазкур чеклов Хитойдан кириб келадиган маҳсулотлар учун таъсир қилмаган – Хитойдан КХДРга 2014 йил январь-апрелида 10 минг долларлик тамаки олиб кирилган бўлса, 2015 йилнинг ҳисобот даврида ҳам мазкур кўрсаткич такрорланган.
Изоҳ (0)