Ўзбекистон терма жамоаси бош мураббийи Миржалол Қосимов 8 июнь кунги машғулотлардан сўнг қисқача интервью берди, деб хабар қилади «Championat.asia».
«8 июндан бошлаб йиғилдик ва машғулотларни бошладик. Йиғинга 24 футболчини жалб этгандик. Бироқ Сервер Жепаров Корея чемпионатида жароҳат олиб қолганлиги боис 23 нафар футболчи билан тайёргарликни давом эттирамиз. Режага кўра, бир ҳафталик йиғин ташкил этганмиз. Жаҳон чемпионатининг иккинчи саралаш босқичи бошланиш арафасида турибди. 16 июнь куни КХДР билан дастлабки тур ўйинини бошлаб оламиз. Биз КХДР билан бўладиган беллашувга Эрон билан ўтказиладиган ўртоқлик баҳси орқали тайёргарлик кўрамиз. Биз жой олган гуруҳни осон деб бўлмайди. Бизнинг олдимизда турган асосий мақсад гуруҳда биринчи ўринни эгаллаб кейинги босқичга йўл олиш. Тайёргарликларимиз ёмон эмас», — дея гап бошлади Миржалол Қосимов.
- Ҳимоя чизиғи хусусида гапириб ўтсангиз. Бу йилги мавсумни кўтаринки руҳда ўтказаётган Шерзод Аъзамов терма жамоага жалб этилмади...- Ҳозирча таркибда янги футболчилардан Икром Алибоев қўшилди. Алибоев илк бор терма жамоа билан биргаликда машғулотларни ўтказмоқда. Айни пайтда таркибда катта ўзгаришларни амалга ошириб, бир қатор футболчиларни синаб кўрадиган вақт эмас. Қисқа муддат ичида КХДР билан бўладиган баҳсга тайёргарлик кўришимиз керак. Шу боис терма жамоа сафида ўйнаш тажрибасига эга Егор Кримец, Ислом Тўхтахўжаев, Шавкат Муллажонов ва Анзур Исмоиловларни жалб этдик. Шерзод Аъзамов яхши ўйнашда давом этиб ҳаракат қилаверса келажакда терма жамоа сафидан ўрин олиши мумкин. Буни вақт кўрсатади.
- Жалб этилган дарвозабонларнинг иккитаси, яъни Игнатий Нестеров ва Акбар Тўраев ҳозирги кунда ўз клубида асосий кипер ҳисобланишмаяпти ва улар ўйин амалиётисиз қолиб кетмоқда. Фақатгина Элдор Суюнов ўз жамоасида мунтазам майдонга тушиб келмоқда. Асосий таркибда қайси дарвозабонни ўйнатиш режангиз бор?- Терма жамоанинг юки оғир. Шу боисдан биз тажрибаси бор дарвозабонларимизни терма жамоага чақирганмиз. Қисқа вақт ичида расмий ўйинга тайёргарлик кўришимиз керак. Машғулотлар жараёнидан келиб чиқиб дарвозабоналаримиздан бирини КХДРга қарши ўйинда майдонга туширамиз. Тўғри, Игнатий Нестеров ўйин амалиётисиз қолиб кетмоқда. Бироқ ушбу посбон фаолияти давомида жуда катта ўйинларда, халқаро учрашувларда майдонга тушган ва бу борада жуда бой тажрибага эга. КХДР билан бўладиган беллашувда Элдор Суюнов ёки Игнатий Нестеровни майдонга туширамиз. Асосий рақобат ушбу иккала дарвозабон ўртасида кечади. Бу кўпинча тайёргарликка боғлиқ. Ким тайёр бўлса, ўшанга ишонамиз. Бу ўйинга яқин маълум бўлади. Бизда назорат учрашувлари, тайёргарлик учун икки ҳафталик йиғинлар йўқ. Қисқа фурсатли йиғинларда янги футболчиларни синовдан ўтказиш муаммо. Уларни синаб олиш учун аввало кўпроқ назорат ва ўртоқлик ўйинлари ташкил этиш зарур. Барча ҳаракатларимиз ва қилаётган ишларимиз ғалаба қозониб, мухлисларимизни хурсанд этиш учундир.
Изоҳ (0)