Германия канцлери Ангела Меркель Instagram ижтимоий тармоғида саҳифа очди ва унга таниқли сиёсий арбоблар, хусусан, Россия президенти Владимир Путин ва Украина давлат раҳбари Пётр Порошенко билан бирга тушган суратларини жойлаштирди. Бу ҳақда «РИА Новости» хабар бермоқда.
Канцлернинг ҳақиқийлиги тасдиқланган саҳифасига ҳозирги қадар 30 мингдан ортиқ фойдаланувчи обуна бўлди. Саҳифа очилганининг биринчи кунидаёқ унга турли тадбирлардан олинган 40дан ортиқ сурат жойлаштирилди.
Саҳифага юкланган суратларда Туркиянинг Сурия билан чегараси яқинидаги шаҳарчада ҳарбий хизматчилар билан мулоқот қилаётган канцлерни, Меркелнинг Рим папаси Франциск билан олиб бораётган суҳбати тасвирланган лавҳаларни ва бошқа суратларни кўриш мумкин.
Instagram – фотосуратлар ва қисқа видеороликларни интернетга жойлаштиришга ихтисослашган сервисдир. Instagram фойдаланувчилари сони жаҳон бўйлаб 200 миллион кишидан ошиб кетган. Ҳар куни улар томонидан сервисга 60 миллион сурат юкланади ва 1,6 миллиард «лайк» қолдирилади.
Изоҳ (0)