Бундан бир оз аввал ЎФФ расмий твиттери орқали Янги Зеландияда бўлғуси Жаҳон чемпионатига тайёргарлик кўраётган Равшан Ҳайдаров бошчилигидаги Ўзбекистон U-20 терма жамоаси Панама ёшларига қарши назорат ўйини ўтказиб, 1:2 ҳисобида мағлуб бўлгани ҳақида хабар берилганди. Ушбу маълумот нотўғри бўлиб чиқди, деб хабар қилади «Uff.uz».
Ўзбекистон футбол федерацияси расмий твиттери ўз хатоси учун узр сўраб, қуйидагиларни маълум қилди:
«Техник муаммо сабаб Ўзбекистон ёшлар терма жамоасининг Панамага қарши ўйинда мағлубиятга учраганлиги ҳақидаги хабарни эътиборсиз қолдирасиз. Янги Зеландиядан алоқага чиққан Ўзбекистон ёшлар терма жамоаси мураббийлар штабига кўра, ўйин 2:2 ҳисобидаги дуранг билан якун топган.
Шу муносабат билан 1:2 ҳисобидаги мағлубият ҳақида ёзилган твитни инобатга олмайсиз. Ноқулайлик учун узр сўраймиз», — дейилади хабарда.
Ўзбекистон футбол федерацияси расмий сайтида берилган хабарда учрашув 2:2 ҳисобида дуранг билан якунланганидан кейин иккала томоннинг келишувига кўра терма жамоалар пенальтилар сериясида ўзаро баҳс олиб боргани айтилган. Ушбу баҳсда Ўзбекистон ёшлар терма жамоаси 5:3 ҳисобида устун келган.
Эслатиб ўтамиз, Ўзбекистон U-20 ёшлар терма жамоаси Жаҳон чемпионатидаги биринчи учрашувини 1 июнь куни Гондурас ёшлар термасига қарши ўтказади.
Ўртоқлик учрашуви
24 май. Велингтон, Янги Зеландия
Ўзбекистон (U-20) — Панама (U-20) — 2:2
Голлар: Сардор Азимов, Элдор Шомуродов
Изоҳ (0)