Чеченистон раҳбари маъмурияти бошлиғи Магомед Даудовнинг Россияда кўпхотинлиликни қонунийлаштириш ҳақида билдирган таклифига Кремль изоҳ беришни истамади, деб хабар қилади «РБК».
Россия президентининг матбуот котиби Дмитрий Песков Даудовнинг баёнотини кўрмаганини айтиб ўтди. «Агар сиз диққат билан қараб, кейин менга кўрсатсангиз, мен сизнинг саволингизга жавоб бераман», — деди Песков.
Чеченистон президенти маъмурияти бошлиғи кўпхотинлиликни расмийлаштириш фикрини билдирганди: «Кўпхотинлилик қонунийлаштирилса, яхши бўларди. Аммо ҳаммаси шариат бўйича бўлиши лозим: агар эркак яна бир хотинни боқишга қурби етса, нима учун бундай қилмаслик керак?»
Даудов бундай ҳолатлар кенг тарқалгани, шунинг учун уни қайсидир йўл билан ҳал қилиш кераклигини таъкидлади. Поп Всеволод Чаплин ҳам кўпхотинлиликни ёқлаб чиқди.
47 ёшли милиция бошлиғи Нажуд Гучигов ва 17 ёшли Луиза Гойлабиеванинг никоҳ тўйидан сўнг кўпхотинлилик масаласи Шимолий Кавказда асосий муҳокама мавзусига айланди.
Изоҳ (0)