Европа дипломатияси раҳбари Федерика Могерини таъкидлашича, Миср собиқ президенти Муҳаммад Мурсий ва унинг тарафдорларига нисбатан қатл ҳукми Мисрнинг халқаро мажбуриятларига тўғри келмайдиган суд иши натижаларига кўра чиқарилган. Бу ҳақда Евроиттифоқ сайтига таяниб, «Сегодня.ua» хабар бермоқда.
Ташқи ишлар ва хавфсизлик сиёсати бўйича ЕИ вакили сўзларига кўра, халқаро стандартларга мувофиқ Миср ҳукумати айбланувчиларнинг адолатли суд ишига бўлган ҳуқуқини таъминлашга мажбур. «Биз, ЕИдагилар ҳукм шикоят аризаси берилгач қайта кўриб чиқилишига ишонамиз. Ҳуқуқлар барқарорлиги ва устунлиги кафолатланиши керак», — дейилади баёнотда.
Ҳужжатда, шунингдек Евроиттифоқ ҳар қандай вазиятларда ўлим жазосига қарши чиқиши таъкидланади.
Эслатиб ўтамиз, 16 май, шанба куни эрталаб Миср собиқ президенти Муҳаммад Мурсий ва «Мусулмон биродарлар» ташкилотининг 105 нафар тарафдори ўлим жазосига ҳукм қилинди. Ҳукм қуйидаги жиноят ишлари якуни бўйича чиқарилган: қамоқхонадан оммавий қочиш, давлатга хиёнат ва ўз давлати фойдасига жосуслик қилиш. Давлатга хиёнат ишида Мурсийнинг исми йўқ эди. Миср собиқ президенти 2011 йили юз берган қамоқхонадан оммавий қочиш иши бўйича ўлимга ҳукм қилинган. Энди ушбу ҳукмни Миср олий муфтийси тасдиқлаб бериши керак.
Изоҳ (0)