Бурунди президенти Пьер Нкурунзиза мамлакат разведкасининг собиқ раҳбари генерал майор Годфруа Нийомбаре тарафдорлари томонидан давлат тўнтаришига уринишдан сўнг биринчи марта мамлакат пойтахтида журналистлар қаршисига чиқди. Бу ҳақда ТАСС хабар бермоқда.
Associated Press ёзишича, Нкурунзиза Бужумбурадаги саройи балконида кўриниш берган. 17 май, якшанба куни пойтахт марказида тинч вазият ҳукм сурган.
Аввалроқ Бурундидаги давлат тўнтарилиши ташкилотчиларидан бири уларнинг уринишлари муваффақиятсизликка учраганини тан олган эди.
Эслатиб ўтамиз, Африка қитъасида жойлашган Бурунди давлатида ҳарбий давлат тўнтаришига уриниш бўлган, кейинроқ у бостирилган эди.
13 майдан 14 майга ўтар кечаси полиция кийимидаги номаълум шахслар иккита хусусий радиостанися ва телеканални эгаллаб, генерал Годфруа Нийомбаре номидан Нкурунзиза учинчи марта президентлик сайловида иштирок этиш истагини билдириб, Конституцияни бузгани учун ҳокимиятдан четлатилиши ҳақидаги мурожаатни ўқиб эшиттирган.
Ўша пайтда Танзанияда бўлиб ўтаётган Африка давлатлари раҳбарлари саммитида иштирок этаётган Бурунди президенти Пьер Нкурунзиза ўзининг Twitter’даги саҳифасида мамлакат аҳолисини хотиржамликка чақириб пост жойлаштирган.
14 май, пайшанба куни президент мамлакатга қайтиб келган.
Изоҳ (0)