Саудия Арабистонининг Жидда аэропортида эронлик зиёратчиларга жинсий шилқимлик қилганликда айбланаётган аэропортнинг икки нафар хавфсизлик офицерлари иши бўйича тергов якунланди ва Саудия Арабистони судига оширилди. Бу ҳақда Эрон Ҳаж ва зиёрат ташкилоти раҳбари Саид Уҳдий маълум қилди, деб ёзади ТАСС.
У Саудия Арабистони ташқи ишлар вазирлигидан уларнинг Жиддадаги консуллигига бу ҳақда расмий хат келиб тушганини айтди.
Эрон ташкилоти раҳбари таъкидлашича, ислом қонун-қоидаларига мувофиқ айбланувчилар шафқатсиз жазо олиши керак.
28 март куни Жидда аэропортида хавфсизлик хизмати ходимлари Саудия Арабистонидан қайтиб кетаётган 14 ва 15 ёшдаги эронлик ўсмир зиёратчиларни жинсий зўрлаган. Бу ҳолат Эронда жиддий эътирозга сабаб бўлиб, ҳатто норозилик намойишлари ҳам бўлиб ўтган.
Норозилик намойишларининг иштирокчилари Теҳрондаги Саудия Арабистони элчихонаси ва Машҳаддаги консуллигини ёпишни, шунингдек, эронликларнинг Саудия Арабистонидаги муқаддас зиёратгоҳларга боришларини тақиқлашни талаб қилиб чиқди.
Шундан сўнг, кўп ўтмай, расмий Теҳрон ушбу ҳолат бўйича тергов-суриштирув ишлари якунланмагунига қадар, Саудия Арабистонига зиёратчиларни олиб борадиган ўз лайнерлари парвозларини тўхтатиб қўйди.
Изоҳ (0)