Хитой Бразилиядаги янги инфратузилма лойиҳаларига инвестиция киритиш учун 50 миллиард доллар ажратади, деб хабар қилади «РИА Новости».
Бу ҳақда Бразилия ташқи ишлар вазири ўринбосари Жозе Граса Лима Хитой давлат кенгаши раҳбари Ли Кэцяннинг расмий ташрифи олдидан маълум қилди.
«Гап тахминан 50 миллиард доллар ҳақида кетмоқда, рақамларни аниқлаштириш ва бу айнан қандай лойиҳалар бўлишини билиш учун ташрифнинг охиригача кутиш керак», — деди Граса Лима.
19 май кунига Ли Кэцян ва Бразилия президенти Дилма Руссеф ўртасида музокаралар ўтказилиши режалаштирилган. 12 йил ичида икки мамлакат ўртасидаги товар айланмаси 10 баробар ўсди. 2001 йилда товар айланмаси 8,3 миллиардни ташкил қилган бўлса, 2013 йилга келиб бу кўрсаткич 83,3 миллиард долларга етди.
Хитой Бразилиядан Тинч океани қирғоқларигача транспорт йўлаги очиш лойиҳасига қизиқмоқда. Перуни ҳам ўз ичига олган бу йўлак орқали Бразилиянинг Хитой халқ республикасига экспорти жиддий равишда ўсади.
Ташриф давомида Хитой томонидан Бразилиянинг Embraer самолётларининг 22 тадан иборат биринчи партиясини сотиб олиши узил-кесил ҳал қилиниши мумкин. Бундай самолётларнинг 60 тасини сотиб олиш бўйича келишув тузилган.
Изоҳ (0)