Ўртаер денгизида юз берган навбатдаги кема ҳалокати натижасида Африкадан Италияга етиб олиш мақсадида бўлган муҳожирларнинг камида 40 нафари ҳалок бўлди. Бу ҳақда «РИА Новости» хабар бермоқда.
Сешанба куни Сицилиянинг Катания портига Zeran савдо кемаси 194 кишини олиб келган. Бу одамлар Ливиядан Италияга сузиб кетаётган икки қайиқдан қутқариб олинган. Қайиқларнинг бирида 105, иккинчисида 197 киши, жумладан, ҳалок бўлган беш кишининг жасади бўлган.
Италиягача етиб келишга муваффақ бўлган ноқонуний муҳожирларнинг Save the Children ташкилоти вакилларига маълум қилишларича, улар қутқариб олинишларидан бироз аввал қайиқлардан бири чўка бошлаган ва унинг йўловчилари сувга ғарқ бўлган.
19 апрель кун Сицилия бўғозида 800 нафар ноқонуний муҳожирнинг ўлимига сабаб бўлган кема ҳалокатидан сўнг Ўртаер денгизидаги ушбу муаммо яна жаҳон жамоатчилиги диққат-эътибори марказига тушди. Ушбу фожеадан сўнг Европа Иттифоқи қочоқларни қутқариш бўйича операцияларни молиялаштиришни янада кучайтиришини эълон қилди.