Қирғизистон бош вазири Жўмарт Ўтўрбаев мамлакат парламентининг пайшанба куни бўлиб ўтган мажлисида ўз истеъфоси ҳақида эълон қилди. Бу ҳақда KNews.kg хабар бермоқда.
Парламент депутатлари ҳукуматнинг 2014 йилги фаолияти тўғрисидаги ҳисоботни тинглаб, уни қониқарли деб топган.
«Берилган баҳодан миннатдорман. Бу бир кишининг иши эмас, бунинг ортида минглаб одамлар меҳнати ётибди. Биз барча вазифалар уддасидан чиқа олмадик, бироқ кўп яхши натижаларга эришдик», - деди бош вазир.
«Мен бош вазир лавозимидан кетишга қарор қилдим. Бу парламентдаги кўпчилик коалициясига яхши ишлаши мумкин бўлган янги бош вазирни танлаш имконини беради. Бундай одамлар орамизда бор, сизларнинг орангизда ҳам бор. Алмаштириб бўлмас одамлар йўқ», - деди Ўтўрбаев.
Эслатиб ўтамиз, Қирғизистон бош вазири Жўмарт Ўтўрбаев истеъфога чиқиш ниятида эканлигини аввалроқ маълум қилганди. Тасдиқланмаган хабарларга кўра, парламент аъзолари бош вазирни ўз хоҳишига кўра ариза ёзишга мажбур қилишган. Сиёсатчиларнинг қайд этишларича, бош вазир истеъфосининг асосий сабаби – сайловлар арафасида бошқарув ресурсига эга бўлишдир.
Изоҳ (0)