Давлат рақобат қўмитаси «Асака» ДАТБ томонидан рақобатга қарши хатти-ҳаракатлар содир этилаётгани тўғрисида суғурта компанияси мурожаатини кўриб чиқди, деб хабар бермоқда қўмита расмий сайти.
Белгиланган лимит тугагани сабабли, банк ва суғурта компанияси ўртасида тузилган кредит шартномаси доирасида «Асака» ДАТБ мижоз томонидан сотиб олинадиган техникага суғурта шартномасини қабул қилишдан бош тортган ва мижозга ўзи томонидан таклиф қилинган 6 та суғурта компаниясидан бири билан суғурта шартномасини тузишни тавсия қилган.
Ўрганиш давомида, банк Бошқаруви баённомасига мувофиқ «Асака» ДАТБни суғурта компаниялари билан ўзаро ҳарактланиши таваккалчилигини белгилаш ва суғурта компанияларининг барқарорлигини баҳолаш методикаси тасдиқлангани, бироқ, ушбу тасдиқланган методика норматив-ҳуқуқий ҳужжат ҳисобланмайди ва Марказий банк томонидан 2011 йил 7 майдаги №14/2-сонли қарор билан тасдиқланган Низом талабларига жавоб бермаслиги аниқланди.
«Асака» ДАТБнинг ушбу хатти-ҳаракати Ўзбекистон Республикасининг «Рақобат тўғрисида»ги Қонунининг 15-моддаси талабларига зид, хусусан маълум товар ёки молия бозорига бошқа хўжалик юритувчи субъектни киришига тўсқинлик қилиш деб топилди.
Натижада, Қўмита томонидан «Асака» ДАТБга нисбатан иш қўзғатилди ва бундан кейин суғурта компанияларига лимит белгилашни тўхтатиш, банкнинг ички ҳужжатларини рақобат тўғрисидаги қонунчилик талабларига мослаштириш тўғрисида кўрсатма берилди.
Изоҳ (0)