Ўзбекистон Республикаси Маданият ва спорт ишлари вазирлиги томонидан Ўзбек Миллий академик драма театрида «Хуш кайфият» қизиқчи ва сўз усталари республика танлови ғолибларини тақдирлашга бағишланган тадбир ўтказилди. Бу ҳақда Ўзбекистон Миллий ахборот агентлиги хабар бермоқда.
«Хуш кайфият» қизиқчи ва сўз усталари республика танловидан кўзланган мақсад номоддий маданий мероснинг энг томошабоп ва ноёб жанрлари бўлган аския, қизиқчилик санъатини кенг тарғиб этиш, улар замиридаги анъаналар мазмун-моҳиятини ёшлар онгига сингдиришдан иборат.
Танловнинг барча босқичида мамлакатнинг турли ҳудудларидан 18 ёшдан 30 ёшгача бўлган 3000 га яқин қизиқчи, сўз устаси, бадиий жамоалар қатнашди. Ижрочиларнинг аскияларида фикрлар мунозараси, ҳозиржавоблик, зийраклик, сўзамоллик, уларнинг маънавий-ахлоқий мезонларга мослигига алоҳида эътибор қаратилди. Танлов жараёнида аскиячилар мустақил мавзуда пайровлар, қизиқчилар эса кулги дарғалари томонидан ижро этилган саҳна асарларидан намуналар, пародия, пантомималар ёрдамида қизиқарли ҳаётий лавҳаларни акс эттирди. Уларнинг чиқишлари сўз усталари, драматурглар томонидан атрофлича баҳоланди.
Аския йўналиши бўйича биринчи ўрин ҳеч кимга насиб этмади. Навоий вилоятидан «Бир зумда» аскиячилар жамоаси иккинчи, Андижон вилоятидан «Аскиячилар» жамоаси учинчи ўринни қўлга киритди. Қизиқчилик йўналишида Қорақалпоғистон Республикасининг «Қизиқчилар» жамоаси биринчи ўринга лойиқ, деб топилди. Тошкентлик Беҳзод Оқбўтаев иккинчи, андижонлик Баҳодир Мажидов учинчи ўринга сазовор бўлди. Афанди латифалари ижроси бўйича андижонлик Сарвар Мамажонов, самарқандлик Хуршид Абдиев ва қашқадарёлик Маъруф Пардаевнинг маҳорати юксак баҳоланди.
Ғолиб ва совриндорларга диплом ҳамда эсдалик совғалари топширилди.
Изоҳ (0)