«Ўзбектелеком» АК Япониянинг NEC корпорацияси ҳамда Toyota Tsusho савдо уйи билан ҳамкорликда сониясига 100 Гбит маълумот ўтказиш имкониятига эга бўлган DWDM (тўлқин узунлиги бўйича маълумот узатиш каналларини зичлаштириш) алоқа тармоғини ишга туширди, дея хабар бермоқда компания матбуот хизмати. Янги алоқа тармоғи мамлакат пойтахти Тошкент шаҳрини юртимиздаги тарихий шаҳарлардан бири бўлган Бухоро билан боғлашга хизмат қилади.
Айтиб ўтиш жоизки, мазкур алоқа тармоғи Марказий Осиёдаги сониясига 100 Гбит маълумот ўтказиш салоҳиятига эга бўлган биринчи телекоммуникация тизими ҳисобланади. Мазкур DWDM тизимида когерент қабул қилиш ва тузатишнинг энг илғор технологиялари қўлланилган. Янги тизим сониясига 10 Гбит маълумот узатувчи анъанавий тизимдан афзалликлари билан ажралиб туради.
Лойиҳа мамлакатимиз аҳолисига юқори тезликдаги ва ишончли интернет хизматларидан фойдаланиш имконини яратиб беришга хизмат қиладиган магистрал маълумот алмашиш тармоқларининг ўтказувчанлик даражасини бир неча маротабага ошириш мақсадида амалга оширилди.
Мазкур лойиҳа видео телефония, Интернет телевидение, юқори тезликдаги интернет, HDТV-каналларни томоша қилиш ва телекоммуникациянинг янги, замонавий хизмат турлари кўпайишига хизмат қилади.
Изоҳ (0)