Ўзбекистон терма жамоаси ютолмаган рақиблар билан танишинг

Ўзбекистон миллий терма жамоаси бугунга қадар 47 та терма жамоага қарши майдонга тушган. Ана шу рақиблар орасида Ўзбекистон вакиллари 11 тасини мағлуб эта олмаган, деб хабар беради «Stadion.uz».

1. Австралия. 3 ўйин, 3 мағлубият. Тўплар нисбати: 0:9

Ўзбекистон терма жамоаси тарихидаги энг ноқулай рақиблардан бири ҳисобланадиган Австралияни мағлуб этиш уёқда турсин, Ўзбекистон вакиллари ҳаттоки дурангга ҳам эриша олмаган. Бунинг устига «яшил қитъа» вакилларига қарши кечган 3 ўйинда бирорта ҳам гол ура олмаган. Тўплар нисбати ҳам дахшатли кўринишга эга 0:9. Австралия Ўзбекистон термасини 2011 йилги Осиё кубоги ярим финалида 6:0 ҳисобида мағлуб этганини таъкидлаб ўтиш жоиз.

2. Эстония. 2 ўйин, 2 дуранг. Тўплар нисбати: 3:3

Ўзбекистон терма жамоаси Европа қитъаси вакили бўлган Эстония термасига қарши 2 та ўртоқлик ўйини ўтказган. Дастлабкиси 2007 йил Тошкентда бўлган ва унда ҳисоб очилмаган эди. Иккинчи баҳс эса Таллинда ўтказилган ва томонлар 3:3 ҳисобидаги дурангга имзо чеккан. Шу тариқа Эстония Ўзбекистондан ютқазмаган навбатдаги рақибга айланди.

3. Беларусь. 2 ўйин, 1 дуранг, 1 мағлубият. Тўплар нисбати: 3:4

Беларусь терма жамоаси билан ҳам 2 та ўртоқлик учрашуви ўтказилган. Дастлабки ўйин Минск шаҳрида бўлган ва унда томонлар 2:2 ҳисобидаги муроса кўчасини танлаган. Жавоб ўйинида эса Европа вакили Тошкентдан 2:1 ҳисобидаги ғалаба билан қайтган.

4. Нигерия. 2 ўйин, 2 мағлубият. Тўплар нисбати: 2:4

Ўзбекистон термасининг Африкалик ягона рақиби Нигерия ҳисобланади. Ўзбекистон вакиллари нигерияликлар билан Афро-Осиё кубогида учрашган. Илк ўйин Тошкентда кечган ва унда қора қитъа вакиллари 3:2 ҳисобида ғалаба қозонган. Жавоб ўйинида ҳам нигерияликлар кичик ҳисобда зафар қучган.

5. Украина. 2 ўйин, 2 мағлубият. Тўплар нисбати: 1:4

Украина термаси ҳам Ўзбекистонга 2 марта рақиб бўлган. Ҳар иккала ўйин ҳам ўртоқлик доирасида бўлиб Киевда ўтказилган. 2007 йилда украиналиклар 2:0 ҳисобида, 2011 йилда эса 2:1 ҳисобида ғалаба қозонган.

6. Арманистон. 2 ўйин, 2 мағлубият. Тўплар нисбати: 1:5

Ўзбекистон вакиллари арманлар билан ҳам 2 марта рўбарў келган ва уларга ҳам ҳар иккала ўйинни бой берган. Дастлабки беллашув 2001 йилда «Албина Мобител» кубоги ўйинига тўғри келган: унда Ўзбекистон рақиби 2:0 ҳисобида ғалабага эришган. Иккинчи баҳс эса Ереванда ўртоқлик мақомида бўлиб ўтган ва мезбонлар 3:1 ҳисобида ютуққа эришган.

7. Сурия. 1 ўйин, 1 мағлубият. Тўплар нисбати: 1:2

Сурия термаси Ўзбекистонга бир марта рақиб бўлган бўлса ҳам, энг муҳим ўйинда Ўзбекистон термасини мағлуб этган эди. 1996 йилги Осиё кубогининг 3-турида Ўзбекистон вакилларини Сурия билан ўйинда дуранг ҳам гуруҳдан олиб чиқар эди. Бироқ сурияликлар ўшанда 2:1 ҳисобида ғалаба қозонган эди.

8. Албания. 1 ўйин, 1 мағлубият. Тўплар нисбати: 0:1

Албания билан ўтказилган ягона учрашув 2010 йил Дурресда бўлиб ўтган. Ўртоқлик учрашуви мақомига эга бўлган баҳсда Европа қитъаси вакили кичик ҳисобда зафар қучган.

9. Черногория. 1 ўйин, 1 мағлубият. Тўплар нисбати: 0:1

Ўзбекистон термаси Черногория билан 2011 йил Подгорицада ўртоқлик учрашуви ўтказган. Ўйиннинг сўнгги сонияларида черногориялик Вукчевишнинг ягона голи мезбонларга ғалабани туҳфа қилган. Ўзбекистон вакиллари эса уйга қуруқ қайтишга мажбур бўлган.

10. Исроил. 1ўйин, 1 мағлубият. Тўплар нисбати: 0:2

2001 йил Ўзбекистон терма жамоаси Исроилда мезбонларга қарши ўртоқлик ўйинида майдонга тушган. Европа қитъаси вакилларининг биринчи бўлимда урган иккита голи ўйинга «нуқта» қўйган эди.

11. Словакия. 1 ўйин, 1 мағлубият. Тўплар нисбати: 1:4

Ўзбекистон футболчилари Словакия терма жамоаси билан 2002 йил учрашган. Ўшанда мезбонлар Ўзбекистон вакилларини аяб ўтирмаган ва йирик 4:1 ҳисобида ғалаба қозонган. Ўзбекистон термасининг ягона жавоб голига Зайниддин Тожиев муаллифлик қилган эди.