O‘zbekiston milliy terma jamoasi bugunga qadar 47 ta terma jamoaga qarshi maydonga tushgan. Ana shu raqiblar orasida O‘zbekiston vakillari 11 tasini mag‘lub eta olmagan, deb xabar beradi “Stadion.uz”.
1. Avstraliya. 3 o‘yin, 3 mag‘lubiyat. To‘plar nisbati: 0:9
O‘zbekiston terma jamoasi tarixidagi eng noqulay raqiblardan biri hisoblanadigan Avstraliyani mag‘lub etish uyoqda tursin, O‘zbekiston vakillari hattoki durangga ham erisha olmagan. Buning ustiga “yashil qit’a” vakillariga qarshi kechgan 3 o‘yinda birorta ham gol ura olmagan. To‘plar nisbati ham daxshatli ko‘rinishga ega 0:9. Avstraliya O‘zbekiston termasini 2011-yilgi Osiyo kubogi yarim finalida 6:0 hisobida mag‘lub etganini ta’kidlab o‘tish joiz.
2. Estoniya. 2 o‘yin, 2 durang. To‘plar nisbati: 3:3
O‘zbekiston terma jamoasi Yevropa qit’asi vakili bo‘lgan Estoniya termasiga qarshi 2 ta o‘rtoqlik o‘yini o‘tkazgan. Dastlabkisi 2007-yil Toshkentda bo‘lgan va unda hisob ochilmagan edi. Ikkinchi bahs esa Tallinda o‘tkazilgan va tomonlar 3:3 hisobidagi durangga imzo chekkan. Shu tariqa Estoniya O‘zbekistondan yutqazmagan navbatdagi raqibga aylandi.
3. Belarus. 2 o‘yin, 1 durang, 1 mag‘lubiyat. To‘plar nisbati: 3:4
Belarus terma jamoasi bilan ham 2 ta o‘rtoqlik uchrashuvi o‘tkazilgan. Dastlabki o‘yin Minsk shahrida bo‘lgan va unda tomonlar 2:2 hisobidagi murosa ko‘chasini tanlagan. Javob o‘yinida esa Yevropa vakili Toshkentdan 2:1 hisobidagi g‘alaba bilan qaytgan.
4. Nigeriya. 2 o‘yin, 2 mag‘lubiyat. To‘plar nisbati: 2:4
O‘zbekiston termasining Afrikalik yagona raqibi Nigeriya hisoblanadi. O‘zbekiston vakillari nigeriyaliklar bilan Afro-Osiyo kubogida uchrashgan. Ilk o‘yin Toshkentda kechgan va unda qora qit’a vakillari 3:2 hisobida g‘alaba qozongan. Javob o‘yinida ham nigeriyaliklar kichik hisobda zafar quchgan.
5. Ukraina. 2 o‘yin, 2 mag‘lubiyat. To‘plar nisbati: 1:4
Ukraina termasi ham O‘zbekistonga 2 marta raqib bo‘lgan. Har ikkala o‘yin ham o‘rtoqlik doirasida bo‘lib Kiyevda o‘tkazilgan. 2007-yilda ukrainaliklar 2:0 hisobida, 2011-yilda esa 2:1 hisobida g‘alaba qozongan.
6. Armaniston. 2 o‘yin, 2 mag‘lubiyat. To‘plar nisbati: 1:5
O‘zbekiston vakillari armanlar bilan ham 2 marta ro‘baro‘ kelgan va ularga ham har ikkala o‘yinni boy bergan. Dastlabki bellashuv 2001-yilda “Albina Mobitel” kubogi o‘yiniga to‘g‘ri kelgan: unda O‘zbekiston raqibi 2:0 hisobida g‘alabaga erishgan. Ikkinchi bahs esa Yerevanda o‘rtoqlik maqomida bo‘lib o‘tgan va mezbonlar 3:1 hisobida yutuqqa erishgan.
7. Suriya. 1 o‘yin, 1 mag‘lubiyat. To‘plar nisbati: 1:2
Suriya termasi O‘zbekistonga bir marta raqib bo‘lgan bo‘lsa ham, eng muhim o‘yinda O‘zbekiston termasini mag‘lub etgan edi. 1996-yilgi Osiyo kubogining 3-turida O‘zbekiston vakillarini Suriya bilan o‘yinda durang ham guruhdan olib chiqar edi. Biroq suriyaliklar o‘shanda 2:1 hisobida g‘alaba qozongan edi.
8. Albaniya. 1 o‘yin, 1 mag‘lubiyat. To‘plar nisbati: 0:1
Albaniya bilan o‘tkazilgan yagona uchrashuv 2010-yil Durresda bo‘lib o‘tgan. O‘rtoqlik uchrashuvi maqomiga ega bo‘lgan bahsda Yevropa qit’asi vakili kichik hisobda zafar quchgan.
9. Chernogoriya. 1 o‘yin, 1 mag‘lubiyat. To‘plar nisbati: 0:1
O‘zbekiston termasi Chernogoriya bilan 2011-yil Podgoritsada o‘rtoqlik uchrashuvi o‘tkazgan. O‘yinning so‘nggi soniyalarida chernogoriyalik Vukchevishning yagona goli mezbonlarga g‘alabani tuhfa qilgan. O‘zbekiston vakillari esa uyga quruq qaytishga majbur bo‘lgan.
10. Isroil. 1o‘yin, 1 mag‘lubiyat. To‘plar nisbati: 0:2
2001-yil O‘zbekiston terma jamoasi Isroilda mezbonlarga qarshi o‘rtoqlik o‘yinida maydonga tushgan. Yevropa qit’asi vakillarining birinchi bo‘limda urgan ikkita goli o‘yinga “nuqta” qo‘ygan edi.
11. Slovakiya. 1 o‘yin, 1 mag‘lubiyat. To‘plar nisbati: 1:4
O‘zbekiston futbolchilari Slovakiya terma jamoasi bilan 2002-yil uchrashgan. O‘shanda mezbonlar O‘zbekiston vakillarini ayab o‘tirmagan va yirik 4:1 hisobida g‘alaba qozongan. O‘zbekiston termasining yagona javob goliga Zayniddin Tojiyev mualliflik qilgan edi.
Izoh (0)