27 январь куни Тошкентдаги «Истиқлол» санъат саройида 80 йиллар юлдузлари иштирокида бўлиб ўтиши керак бўлган концертда фақатгина ўзбек эстрадаси вакиллари иштирок этгани хабар берилган эди. Facebook’даги «Potrebitel.uz» гуруҳида ушбу ҳолатнинг бошқа тафсилотлари эълон қилинди.
Қайд этилишича, шоуда иштирок этиши эълон қилинган Boney-M, Ottawan, «Комбинация» гуруҳлари, Наталя Гулкина, Алиса Мондан фақатгина Boney-M гуруҳининг бир аъзоси саҳнага чиққан. Фойдаланувчилардан бири концерт эълонидаги телефон рақамларига қўнғриоқ қилганда, сотиб олинган чипталарнинг пулларини 10 кундан кейин қайтаришга ваъда беришган.
Гуруҳ аъзоларидан бири таклиф қилинган артистларнинг концерт директорларига мактуб ёзиб, улар нима учун концертга келмагани тўғрисида жавоб олган. Жавоб мактубида ёзилишича, «Комбинация» гуруҳи, Наталя Гулкина ва Алиса Моннинг концерт директори 27 январь кунги концерт учун дастлабки иккаласидан ташқари Алиса Монни ҳам тавсия қилганда рад жавобини олган ва унинг номи нима учун афишаларга киритилганига ҳайрон қолган.
Концерт директори шоу-бизнесдаги фаолияти давомида бунчалик ёмон ташкилотчиликка гувоҳ бўлмаганини қайд этган. Шартномага биноан, артистлар Тошкентга етиб келишидан олдин гонорар 100 фоиз тўланиши керак бўлган, бироқ ташкилотчилар турли баҳоналар билан бу ишни кечиктираверган. Гонорар Тошкентга 25 январь куни етиб келган Boney-M гуруҳи маъмурларига бериб қўйилишига келишилган. Бироқ бу ҳам амалга ошмаган.
Директорнинг ёзишича, у «Комбинация» гуруҳи ва Наталя Гулкинага 26 январь тунда Тошкентга учишни тайинлаган, шартнома бўйича Москва−Тошкент−Москва авиачиптасини ҳам ташкилотчилар олиб бериши керак бўлган. Бироқ аэропортда чипта фақатгина буюртма берилгани, бироқ пули тўланамагани маълум бўлган. Директорнинг ташкилотчилар билан боғланиши самара бермаган ва артистлар уйга қайтишига тўғри келган. Улар ҳалигача алоқага чиқмаганини маълум қилган.
Изоҳ (0)