Франция бош вазири Мануэль Вальс Charlie Hebdo сатирик ҳафтаномасининг таҳририятига теракт уюштиришда айбланиб бир неча киши қўлга олинганини маълум қилди, деб хабар бермоқда Agence France-Presse.
Қўлга олинганларнинг сони ва исм-шарифларига ойдинлик киритмаган бош вазир асосий гумондорлар − ака-ука Шериф ва Саид Куаши ҳалигача озодликда юрганини маълум қилган. Ўз навбатида, агентлик Франция ички ишлар вазири Бернар Казневнинг 7 киши қўлга олингани ҳақидаги сўзларини келтирган.
Гумондорларнинг яна бири − 18 ёшли Ҳамид Мурод ўз хоҳиши билан полицияга келиб, бу воқеаларга алоқаси йўқлигини ва бунга далили борлигини маълум қилган. Унинг сўзларини бир неча гувоҳ тасдиқлаган.
8 январга ўтар кечаси Франция полицияси гумондорларнинг бармоқ изларини аниқлаш мақсадида Реймсда махсус операция ўтказган. Шунингдек, Бельгия чегараси яқинидаги Шарлевиль-Мезьер шаҳрида ҳам тинтув ўтказилиб, уларнинг қариндоши қўлга олинган. Унга нисбатан ҳеч қандай айблов эълон қилинмаган, ундан фақатгина кўрсатмалар олиниши маълум қилинган.
Изоҳ (0)