Барак Обама Россияга қарши санкцияларни янада кучайтиришга ваъда берди

Москванинг яқин орада Украина борасидаги сиёсий қарашини ўзгартиришига умид қилмаётган АҚШ президенти Барак Обама Россияга санкциялар орқали босим ўтказишни давом эттиришга ваъда берди, деб хабар бермоқда «Кун» «RBK.ru».

Америка президенти агар Ғарб томонидан қўлланилаётган санкциялардан кўрилаётган зарар иқтисодий соҳадан сиёсий соҳага ўтса, вазият ўзгариши мумкин, деб ишонч билдирмоқда. У ўзининг бу борадаги мақсадларини ишбилармон доиралар вакиллари билан бўлган учрашув чоғида эълон қилди.

Америка раҳбарининг сўзларига кўра, Владимир Путин «ўтмишга асосланган миллийчилик» ёндашувини қўллаб, ўзининг бу ҳаракатлари билан «қўшни давлатларни қўрқитмоқчи бўлмоқда».

Путин юритаётан мазкур сиёсат фақатгина мамлакат ичида қўллаб-қувватланмоқда, деб қўшимча қилди у. Обаманинг фикрича, Ғарб томонидан қўлланилаётган санкциялардан кўрилаётган зарар иқтисодий соҳадан сиёсий соҳага ўтмагунича, Путин ўз фикрини ўзгартирмайди. «Шунинг учун биз босим ўтказишни давом эттираверамиз», — деб қўшимча қилди у.

Ўз навбатида, Европа Иттифоқи Россияга қарши санкциялар қўллаш масаласини Донецк ва Луганск халқ республикаларида маҳаллий сайловлар бўлиб ўтгандан кейин ноябрь ойида охирги марта кўтарган эди. Ноябрь ойининг охирида Европа Иттифоқи бу сиёсий жараёнлар ортида санкция рўйхатини яна 13 та мухолифат вакиллари ва бешта ташкилот ҳисобига кенгайтирган эди. Россияга қарши бошқа чеклов чоралари қўллашга қарор қилинмаган.