Moskvaning yaqin orada Ukraina borasidagi siyosiy qarashini o‘zgartirishiga umid qilmayotgan AQSh prezidenti Barak Obama Rossiyaga sanksiyalar orqali bosim o‘tkazishni davom ettirishga va’da berdi, deb xabar bermoqda “Kun” “RBK.ru”.

Amerika prezidenti agar G‘arb tomonidan qo‘llanilayotgan sanksiyalardan ko‘rilayotgan zarar iqtisodiy sohadan siyosiy sohaga o‘tsa, vaziyat o‘zgarishi mumkin, deb ishonch bildirmoqda. U o‘zining bu boradagi maqsadlarini ishbilarmon doiralar vakillari bilan bo‘lgan uchrashuv chog‘ida e’lon qildi.

Amerika rahbarining so‘zlariga ko‘ra, Vladimir Putin “o‘tmishga asoslangan milliychilik” yondashuvini qo‘llab, o‘zining bu harakatlari bilan “qo‘shni davlatlarni qo‘rqitmoqchi bo‘lmoqda”.

Putin yuritayotan mazkur siyosat faqatgina mamlakat ichida qo‘llab-quvvatlanmoqda, deb qo‘shimcha qildi u. Obamaning fikricha, G‘arb tomonidan qo‘llanilayotgan sanksiyalardan ko‘rilayotgan zarar iqtisodiy sohadan siyosiy sohaga o‘tmagunicha, Putin o‘z fikrini o‘zgartirmaydi. “Shuning uchun biz bosim o‘tkazishni davom ettiraveramiz”, — deb qo‘shimcha qildi u.

O‘z navbatida, Yevropa Ittifoqi Rossiyaga qarshi sanksiyalar qo‘llash masalasini Donetsk va Lugansk xalq respublikalarida mahalliy saylovlar bo‘lib o‘tgandan keyin noyabr oyida oxirgi marta ko‘targan edi. Noyabr oyining oxirida Yevropa Ittifoqi bu siyosiy jarayonlar ortida sanksiya ro‘yxatini yana 13 ta muxolifat vakillari va beshta tashkilot hisobiga kengaytirgan edi. Rossiyaga qarshi boshqa cheklov choralari qo‘llashga qaror qilinmagan.