Ўзбекистон ва Польша ўртасидаги товар айланмаси 130 миллион долларни ташкил этди
Тошкентда Ўзбекистондаги Польша Элчихонаси савдо ва инвестицияга кўмаклашиш бўлими томонидан Ўзбекистон ва Польша давлатларининг ўзаро иқтисодий ҳамкорлигини ривожлантириш масаласига бағишланган матбуот анжумани бўлиб ўтди. Бу ҳақда «Туркистон-пресс» хабар берди.
Анжуманда айтиб ўтилишича, жорий йилнинг январь—сентябрь ойларида Польша—Ўзбекистон савдо айланмаси 127,5 миллион долларни ташкил қилди. Шу даврда Польшанинг Ўзбекистонга экспорти 104 миллион долларга тенг бўлди. Умуман олганда, савдо айланмаси ҳажми ўтган йилга нисбатан 97 фоизни ташкил қилмоқда.
Мазкур пасайиш асосан ташқи салбий омиллар таъсири билан боғлиқлиги таъкидланди. Натижада, Польша экспорти товар гуруҳларининг 19 тадан 17 тага камайиши, шунингдек йирик қорамол, ўсимлик маҳсулотлари, тайёр озиқ-овқат ва бошқа етакчи экспорт гуруҳлари ҳажмининг пасайиши кузатилди. Бир вақтнинг ўзида ўсимлик мойи, улардан ишланган маҳсулотлар, тўқимачилик, енгил саноат, тош, гипс, цемент, асбест, шиша буюмларнинг экспорти жадал суръатларда ўсиб борди. Шу билан бирга, машина, ускуналар, рангли металлардан ишланган буюмлар таъминоти ҳам ошди.
Ўзбек маҳсулотларининг Польшага импорти эса жорий йил бошидан буён 23,2 миллион доллардан ошди. 9 ой мобайнида ўзбек экспорти 13 та маҳсулот гуруҳи томонидан тақдим этилган бўлса, ўтган йилнинг мос даврида бу кўрсаткич 11 та гуруҳни ташкил қилган эди. Ҳисобот даврида Ўзбекистондан Польшага рангли металлардан ишланган буюмлар, ўсимликлардан етиштирилган маҳсулотлар, пахта толаси, тўқимачилик ва кимёвий саноат маҳсулотларини етказиб бериш ҳажмлари сезиларли ўсди.
