Ўзбекистон миллий олимпия қўмитаси раҳбари Андижон вилоятига ташриф буюрди
Ўзбекистон миллий олимпия қўмитаси ҳамда Республика футбол федерацияси раҳбари, сенатор Мираброр Усманов бошчилигидаги бир гуруҳ мутахассислар Андижон ҳамда Фарғона вилоятларида бўлиб, бу ерда спорт соҳасини ривожлантириш борасида амалга оширилаётган ишлар билан яқиндан танишди. Бу ҳақда Ўзбекистон миллий олимпия қўмитаси расмий сайти хабар бермоқда.
Андижон вилояти ҳокимлигида йиғилиш бўлиб ўтиб, уни вилоят ҳокими Шуҳрат Абдураҳмонов очиб берди.
Йиғилишда Маданият ва спорт ишлари вазирининг биринчи ўринбосари Мурод Алиев, Ўзбекистон миллий олимпия қўмитасининг Андижон вилояти бўйича вакили Абдулла Зиаидов, вилоятда фаолият олиб бораётган мураббий ва спортчилар сўзга чиқиб, Андижонда замонавий спорт саройларини қад ростлаши натижасида иқтидорли ёшлар сафини кенгайтириш учун барча шароитлар яратилганлиги, мураббийлар малакасини янада ошириш борасида амалга оширилаётган саъй-ҳаракатлар хусусида атрофлича маълумот берди.
Йиғилишда Ўзбекистон миллий олимпия қўмитаси раиси, Республика футбол федерацияси раҳбари, сенатор Мираброр Усманов ҳам сўзга чиқиб, вилоятда кўпгина соҳаларда бўлгани каби спортни янада тараққий эттириш, энг аввало, эртанинг эгаларини ҳар томонлама соғлом қилиб вояга етказиш борасида кенг кўламдаги ишлар амалга оширилаётганлигини таъкидлаб ўтди.
Миллий олимпия қўмитаси раҳбари йиғилганлар эътиборини вилоятда миллионлар ўйини ҳисобланган футболни ривожлантириш борасида олиб борилаётган ишларга қаратди.
«Куни кеча Ўзбекистон ПФЛ томонидан 2015 йилги мавсумда олий лигада 16 жамоа тўп суриши тўғрисида қарор қабул қилинди. Шу тариқа, ‘Андижон’ жамоаси ҳам келаси йилги мавсумни олий лигада бошлаши маълум бўлди», — деди М. Усманов.
Мираброр Усманов бошчилигидаги делегация аъзолари Андижон вилоятига уюштирилган сафар давомида Бўстон даҳасида жойлашган «Андижон» клуби футбол мактабига ташриф буюрди. Бу ерда Ўзбекистон миллий олимпия қўмитаси раҳбари футбол мактаби директори Муҳаммадқосим Тўхтасинов билан суҳбатлашиб, мактабда олиб борилаётган ишлар билан яқиндан танишди.
МОҚ раҳбари, шунингдек, Андижон шаҳри марказида барпо этилаётган қиличбозлик марказида ҳам бўлиб, бу ерда олиб борилаётган қурилиш ишларини кўздан кечирди.
Куннинг иккинчи ярмида Мираброр Усманов бошчилигидаги делегация Фарғона вилоятига ташриф буюрди.
