17 ноябрь куни Ўзбекистон Республикаси Марказий сайлов комиссиясида Европа иттифоқининг мамлакатимизда аккредитациядан ўтган дипломатик миссиялари раҳбарлари билан учрашув бўлиб ўтди, деб хабар бермоқда 2014 йилги сайловларни ёритиш бўйича Республика матбуот маркази.
Тадбирда Марказий сайлов комиссияси раиси М. Абдусаломов меҳмонларга Ўзбекистон Республикаси Олий Мажлиси Қонунчилик палатаси, халқ депутатлари вилоят, туман ва шаҳар Кенгашлари сайловига тайёргарлик кўриш жараёни ҳақида сўзлаб берди.
Таъкидланганидек, мамлакатимизда барқарор ва изчил ривожланаётган сиёсий тизим яратилди, профессионал асосда икки палатали парламент фаолият кўрсатмоқда, фуқаролар ва сиёсий партияларнинг сайлов жараёнида эркин, фаол иштирок этиши учун барча зарур ташкилий-ҳуқуқий шароитлар яратилган.
Миссияларнинг раҳбарлари Ўзбекистоннинг сайлов жараёнини янада демократлаштиришга, сайловга тайёргарлик кўриш ва уни ўтказиш амалиётини такомиллаштиришга қаратилган сайлов қонунчилигидаги янги меъёрлар билан таништирилди.
Шунингдек, барча сиёсий партиялар, депутатликка номзодларга сайловолди ташвиқоти даврида тенг шароитлар яратилиши сайлов қонунчилигининг ижобий белгиларидан бири эканлиги ҳақида фикр юритилди.
Европа иттифоқи делегацияси аъзолари мамлакатимизда сайлов амалиётини такомиллаштириш соҳасида амалга оширилаётган ўзгартишларнинг муҳимлигини таъкидладилар.
Ўзбекистон Марказий сайлов комиссияси хорижий давлатлар ва халқаро ташкилотлардан кузатувчиларни таклиф қилди.
Учрашув мобайнида бутун сайлов жараёнининг очиқлиги ва ошкоралигини, халқаро кузатувчиларнинг иштирокини таъминлаш муҳимлиги таъкидланди. Халқаро ташкилотлар ва чет давлатларнинг кўп вакиллари Ўзбекистондаги сайловларни кузатишда иштирок этиш истагини билдирди.
Изоҳ (0)