17-ноябр куни 2014 йилги сайловларни ёритиш бўйича Республика матбуот марказида мамлакатимиз ва чет эл журналистлари учун матбуот анжумани ўтказилди. Бу ҳақда Ўзбекистон Республикаси Марказий сайлов комиссияси матбуот хизмати хабар берди.
Марказий сайлов комиссияси раиси М.Абдусаломов оммавий ахборот воситалари ходимларига Марказий сайлов комиссиясининг мажлиси ҳақида ахборот берди ва журналистларни мазкур мажлисда қабул қилинган Ўзбекистон Республикаси Олий Мажлиси Қонунчилик палатаси депутатлигига сиёсий партиялардан кўрсатилган номзодларни рўйхатга олиш ва сайловолди ташвиқотини олиб бориш тартиби тўғрисидаги қарорлар билан таништирди.
Хабарда эслатилишича, мамлакатдаги барча сиёсий партиялар қонунда белгиланган муддатларда ўзининг қурултой ва съездларини ўтказди. Ушбу тадбирларда партиялар томонидан Олий Мажлис Қонунчилик палатаси депутатлигига номзодлар кўрсатилди. Шундан сўнг, сиёсий партияларнинг раҳбарлари депутатликка номзодларни рўйхатга олишни сўраб Марказий сайлов комиссиясига мурожаат этди.
Айни пайтда «Ўзбекистон Республикаси Олий Мажлисига сайлов тўғрисида»ги Қонуннинг 22-моддасига биноан, хотин-қизлар сони сиёсий партиялардан кўрсатилган депутатликка номзодлар умумий сонининг камида ўттиз фоизини ташкил этиши лозимлиги ҳақидаги қонун меъёрига амал қилинганига алоҳида эътибор қаратилди. Рўйхатга олинган номзодларнинг 31,8 фоизини хотин-қизлар ташкил этади.
Парламент қуйи палатаси депутатлигига номзодлар орасида таълим-тарбия соҳаси вакиллари 26,5 фоизни, иқтисодчилар 20,8, ишлаб чиқариш соҳаси вакиллари 20,2, ҳуқуқ соҳаси вакиллари 14,2, соғлиқни сақлаш тизими ходимлари 10,1 фоизни ташкил этади. Номзодларнинг барчаси олий маълумотли бўлиб, уларнинг 21,7 фоизи фан доктори ёки фан номзоди илмий даражасига эга. 13,8 фоизи илгари ҳам депутатликка сайланган.
«Ўзбекистон Республикаси Олий Мажлисига сайлов тўғрисида»ги Қонуннинг 26-моддасига биноан, депутатликка номзодларни рўйхатга олиш қонунда белгиланган муддатда тугалланди.
Сайлов қонунчилиги талабларига мувофиқ, Марказий сайлов комиссияси томонидан рўйхатга олинган Олий Мажлис Қонунчилик палатаси депутатлигига номзодларнинг рўйхати номзоднинг фамилияси, исми ва отасининг исми, туғилган йили, қайси партияга мансублиги, эгаллаб турган лавозими, иш ва яшаш жойи, шунингдек, уни депутатликка номзод этиб кўрсатган сиёсий партияни кўрсатган ҳолда маҳаллий матбуотда эълон қилинади.
Матбуот анжуманида депутатликка номзодлар рўйхатга олингач, сайлов жараёнининг муҳим босқичи – сайловолди ташвиқоти бошланиши таъкидланди. Бу жараён сайлов қонунчилиги талаблари асосида амалга оширилади.
Матбуот анжуманида қайд этилганидек, сиёсий рақобат ва курашнинг адолатли, холисона, очиқ ва ошкора олиб борилиши учун барча сиёсий партиялар, депутатликка номзодларга тенг имконият ва кафолатлар яратилиши сиёсий плюрализм, яъни, фикрлар хилма-хиллиги асосидаги соғлом рақобатни таъминлайди.
Изоҳ (0)