2014 йилнинг 12 ноябрь куни Жиззахда «Миллий спорт турлари ва халқ ўйинлари» фестивали бошланди. Бу ҳақда Жиззах шаҳар ҳокимлиги ахборот хизмати хабар бермоқда.
Ўзбекистон маданият ва спорт ишлари вазирлиги, Республика миллий спорт ишларини ривожлантириш Маркази Бош дирекцияси ҳамда Жиззах вилоят ҳокимлиги томонидан ташкил этилган мазкур мусобақага барча вилоятлардан жами 700 нафардан зиёд спортчи ташриф буюрди.
Жиззах отчопари марказий саҳнасида бўлиб ўтган фестивалнинг тантанали очилиш маросимида нутқ сўзлаган Жиззах туман ҳокими Акмал Абдуллаев илк бор ўтказилаётган мазкур спорт фестивалининг аҳамиятига тўхталар экан, Жиззах тумани мазкур баҳсларни ўтказишга мезбонлик қилаётгани билан фахрланишини таъкидлади.
Кураш, белбоғли кураш, бел олиш, ўзбек жанг санъати ҳамда турон якка кураши бўйича ўтказилган баҳслар ёшлар ўртасида спортнинг ушбу турларини оммалаштиришга хизмат қилса, ўзбек халқининг кўп минг йиллик анъаналарини ўзида акс эттирган улоқ-кўпкари мусобақалари миллий – маънавий меросни тараннум этишда муҳим аҳамият касб этади.
Фестивалнинг тантанали очилиш маросимидан сўнг спортчи ёшлар томонидан «Ўзбек жанг санъати» тури бўйича кўргазмали чиқишлар намойиш этилди. Шундан сўнг баҳсларга старт берилиб, спортчи ёшлар биринчилик учун гиламга тушди.
Мусобақанинг саралаш босқичлари бугун якунланса, эртага 13 ноябрь куни финал мусобақаларини ўтказиш режалаштирилган. Шу куни соат 12:00 дан 17:00 га қадар «Улоқ-кўпкари» мусобақалари бўлиб ўтади.
Ғолиб ва совриндорлар баҳслар якунлангач, фестиваль ташкилотчилари томонидан тақдирланиши кутилмоқда.
Изоҳ (0)