iOS operatsion tizimining 8-versiyasini yuklab olish mumkin bo‘ldi

17-sentabr kuni Apple mobil qurilmalari uchun mo‘ljallangan operatsion tizimning yangi versiyasi – iOS 8’ni rasman foydalanish uchun topshirdi. Bu haqda The Verge ma’lumotiga asoslanib “Parol” nashri xabar berdi.

Yangi iOS 8 versiyasi iPhone 4s, iPhone 5, iPhone 5s, iPad 2, iPad 3, iPad 4, iPad Air, iPad mini, Retina displeyli iPad mini va iPod touch’ning beshinchi avlodi uchun mo‘ljallangan.

Foydalanuvchilar iOS 8’ni qurilmaning sozlashlar bo‘limi yoki iTunes’ning so‘nggi versiyasidan yuklab olishlari mumkin. Yangi iOS versiyasi 1,4 Gb hajmda bo‘lib, uni o‘rnatish uchun iPhone xotirasida 5,7 Gb, iPad xotirasida esa 6,9 Gb bo‘sh joy bo‘lishi zarur.

iOS 8’da yangi HealthKit – sog‘lik va fitnes dasturlari markazi, Family Sharing – iTunes, iBooks va App Store’dan qilingan xaridlarini oila a’zolari bilan bo‘lishish, guruh bo‘lib xabarlashish funksiyalari bor.

Shuningdek, iOS 8’da yanada yaxshiroq ko‘rinishdagi bildirishnomalar, Spotlight – dasturlar orasida izlash funksiyasi va boshqa yangiliklar mavjud.