22 август куни Ўзбекистон мустақиллигининг йигирма уч йиллиги муносабати билан фан, таълим, соғлиқни сақлаш, адабиёт, маданият, санъат, маънавият ва маърифат, оммавий ахборот воситалари ҳамда ижтимоий соҳалар ходимларидан бир гуруҳини мукофотлаш тўғрисида Ўзбекистон Республикаси Президентининг фармони эълон қилинди, деб хабар бермоқда Ўзбекистон Миллий ахборот агентлиги.
Фармонга мувофиқ, Ўзбекистон мустақиллигини мустаҳкамлаш, миллий ғояни ривожлантириш, маънавиятни тиклаш, ўзликни англаш йўлида катта ҳисса қўшган, ёрқин истеъдоди ва ижоди, илмий фаолияти, ҳалол хизмати, ёшларни она юртга муҳаббат, истиқлол ғояларига садоқат руҳида соғлом ва баркамол этиб тарбиялаш ҳамда жамоат ишларидаги фаол иштироки учун бир неча Ўзбекистон фуқаролари қуйидаги фахрий унвон ва орденлар билан тақдирланди:
- «Ўзбекистон Республикаси халқ артисти»;
- «Ўзбекистон Республикаси халқ бахшиси»;
- «Ўзбекистон Республикаси халқ устаси»;
- «Ўзбекистон Республикаси халқ ўқитувчиси»;
- «Ўзбекистон Республикаси халқ ҳофизи»;
- «Ўзбекистон Республикасида хизмат кўрсатган артист»;
- «Ўзбекистон Республикасида хизмат кўрсатган ёшлар мураббийи»;
- «Ўзбекистон Республикасида хизмат кўрсатган журналист»;
- «Ўзбекистон Республикасида хизмат кўрсатган маданият ходими»;
- «Ўзбекистон Республикасида хизмат кўрсатган соғлиқни сақлаш ходими»;
- «Ўзбекистон Республикасида хизмат кўрсатган спорт устози»;
- «Ўзбекистон Республикасида хизмат кўрсатган спортчи»;
- «Ўзбекистон Республикасида хизмат кўрсатган халқ таълими ходими»;
- «Буюк хизматлари учун» ордени;
- «Эл-юрт ҳурмати» ордени;
- «Фидокорона хизматлари учун» ордени;
- «Меҳнат шуҳрати» ордени.
Шунингдек, фан, таълим, адабиёт, маданият сингари соҳаларда фаолият юритувчи бир қатор ходимлар «Дўстлик» ордени; Ўзбекистонда амалга оширилаётган маънавий-маърифий ва ижтимоий ислоҳотларда фаол иштирок этган, самарали меҳнат қилган, ёш авлодни Ватанга муҳаббат, миллий ва умуминсоний қадриятларга ҳурмат руҳида тарбиялаш ишига ҳисса қўшган фуқаролар эса «Шуҳрат» медали билан тақдирланди.
Тўлиқ матн билан Ўзбекистон Миллий ахборот агентлигининг ахборот хизматида танишишингиз мумкин.
Изоҳ (0)