Mover.Uz’дан видео юклаб олиш имконияти пайдо бўлди

Ўзбекистондаги энг оммабоп видеохостинг – Mover.Uz’дан видео юклаб олиш имконини берувчи «Янгичек» номли кенгайтма ишлаб чиқилди. Бу ҳақда «Кун» нашри хабар берди.

Кенгайтма Фарҳоджон Чинбердиев томонидан ишлаб чиқилган ва ҳозирча фақатгина Google Chrome браузери учун мўлжалланган.

Mover.Uz’дан «Янгичек» ёрдамида видео юклаб олиш учун кенгайтмани Chrome интернет-дўконидан бепул юклаб олиш ва компьютерга ўрнатиш керак. Шундан сўнг Mover.Uz сайтига Google Chrome браузери орқали кирилади ва ҳар бир видео остида юклаб олиш тугмаси пайдо бўлади. Юклаб олиш тугмаси босилганда, кенгайтма видеонинг энг сифатли турини юклашга буюради.

Девелопер ўз блогида маълум қилишича, келажакда «Янгичек» кенгайтмаси ёрдамида бошқа видеохостинглардан ҳам видео юклаб олиш имконияти қўшилади.