Ўзбекистон — Латвия бизнес-форумида ҳамкорлик ҳужжатлари имзоланди
Латвия Республикаси Президенти Андрис Берзиньшнинг расмий ташрифи доирасида 28 май куни Ўзбекистон ва Латвия ишбилармон доираларининг бизнес-форуми бўлиб ўтди, деб хабар бермоқда ЎзА.
Тадбирда икки мамлакатнинг ташқи иқтисодий алоқалар, савдо, сармоя, банк-молия, ёқилғи-енергетика, машинасозлик, авиаташув, қурилиш, қишлоқ ва сув хўжалиги, геология, озиқ-овқат, кимё, енгил саноат, тўқимачилик, электрон маҳсулотлар ишлаб чиқариш, мебелсозлик, меъморчилик, фармацевтика, транспорт ва транспорт коммуникациялари, логистика, божхона, суғурта, экспорт-импорт, алоқа, ахборот технологиялари ва телекоммуникациялар, соғлиқни сақлаш, сайёҳлик ва фан-таълим каби соҳалар учун масъул вазирлик ва идоралари, компания ва концернлари раҳбарлари иштирок этди.
Ўзбекистонда Латвия сармояси иштирокида тузилган 21 қўшма корхона фаолият кўрсатмоқда. Улар мебелсозлик, нефтни қайта ишлаш, полиграфия, транспорт ва логистика, улгуржи савдо ва хизмат кўрсатиш ҳамда мева-сабзавот маҳсулотларини қайта ишлаш каби соҳаларга ихтисослашган. Юртимизда ушбу мамлакатнинг 19 етакчи компанияси ўз ваколатхонасини очган.
– Ўзбекистон – Латвиянинг Марказий Осиёдаги ишончли ҳамкорларидан, – деди Латвия Республикаси иқтисодиёт вазири Вячэслав Домбровский. – Мамлакатларимиз ўртасидаги ўзаро савдо айланмаси мунтазам ўсиб бормоқда. Латвияда ўзбекистонлик сармоядорлар иштирокида тузилган қўшма корхоналар муваффақиятли фаолият юритмоқда. Икки мамлакат ўртасида мунтазам амалга оширилаётган авиақатнов сайёҳлик соҳасидаги истиқболли ҳамкорликни ривожлантиришга катта ҳисса қўшмоқда. Латвия Ўзбекистон билан бошқа соҳалар қатори таълим жабҳасидаги ҳамкорликни янада мустаҳкамлашдан манфаатдор.
Анжуманда Латвиянинг қатор йирик компанияларидан юзга яқин вакил иштирок этганининг ўзиёқ ушбу мамлакатнинг Ўзбекистон билан ҳамкорликни ривожлантиришга қизиқиши катта эканидан далолатдир. LDZ Cargo, Astra Logistic, Ave Trans Group, BAO, HCT Automotive, IMC Scrapers EAME, Baltbio, Travel Agency Spare, Tonus Elast, Lauma Fabrics, A&A Logistic каби компаниялар вакиллари Ўзбекистон бозоридаги ўз фаолиятини йўлга қўйиш ва кенгайтириш ниятида эканини қайд этди.
– Компаниямиз тўқимачилик саноатида фаолият юритади, – деди «Никол Джумон» компанияси раиси Николай Бирюков. – Ўзбекистон бозори ғоят истиқболли экани билан бизга манзур бўлмоқда. Ўзбекистонда аёллар кийим-кечаги ишлаб чиқаришга ихтисослашган қўшма корхона ташкил этиш ниятидамиз.
Бизнес-форум доирасида таълим, енгил саноат, тўқимачилик, экспортни қўллаб-қувватлаш ва коммунал соҳаларда ҳамкорликка оид ҳужжатлар имзоланди.
Шу куни Ўзбекистоннинг қатор компания ва корхоналари ҳамда Латвия ишбилармон доиралари вакиллари иштирокида кооперацион биржа ўтказилди. Ўзбекистонда ишлаб чиқарилган бир қатор товарларни экспорт қилиш бўйича шартномалар тузилди.
Меҳмонлар General Motors Powertrain Uzbekistan ва Rieter Uzbekistan корхоналари фаолияти билан танишди.
